तेल अभिभ । हिजबुल्लाहका वरिष्ठ सैन्य कमाण्डर फाउद शुक्रको हत्यापछि लेबनान, इजरायल र सम्पूर्ण क्षेत्र करिब एक महिनादेखि हिजबुल्लाहको बदलाको प्रतीक्षामा थिए। लेबनानको राजधानी बेरुतको दक्षिणी क्षेत्र दहियामा रहेको एक आवासीय भवनमा इजरायलले गरेको आक्रमणमा फाउद शुक्रको मृत्यु भएको थियो ।
फाउद शुक्रको मृत्यु पछि हिजबुल्लाह नेता हसन नसरल्लाहले बदला लिने वाचा गरेका थिए । आइतबार हिजबुल्लाहले जवाफी कारवाहीको पहिलो चरणमा रकेट र ड्रोन आक्रमण गर्यो। हिजबुल्लाहले इजरायलमा ३ सय रकेट प्रहार गरेको दाबी गरेको छ ।
हिजबुल्लाहले आफ्नो आक्रमण सफल भएको घोषणा गरेको छ ।
उता, इजरायलले हिजबुल्लाहको योजनालाई असफल पारेको दाबी गर्दै बिहानै जवाफी आक्रमण गरेको जनाएको छ । एक इजरायली सैन्य प्रवक्ताले हिजबुल्लाहका केही लक्ष्यहरू मध्य इजरायलमा थिए। यद्यपि, यी लक्ष्यहरू हिजबुल्लाहको आक्रमणबाट अछुतो रहे।
आइतबारको पछिल्लो आक्रमणले हिजबुल्लाह र इजरायलबिच थप तनावको चिन्ता बढाएको छ। अहिलेसम्म इजरायल र हिजबुल्लाहबिचको कारबाही सीमा क्षेत्रमा मात्र सीमित रहेको थियो ।
बिहान इजरायली प्रधानमन्त्री बेन्जामिन नेतान्याहुले भने, ‘जसले हामीलाई हानि पुर्याउने प्रयास गर्छ, हामी उसलाई हानि गर्छौँ ।’ गाजामा बन्दीहरूको रिहाइका लागि युद्धविराम र सम्झौतामा पुग्ने प्रयास भइरहेका बेला यी आक्रमणहरू भएका हुन्। तनाव बढे पनि पछि वार्ता जारी रहने अपेक्षा गरिएको छ ।
अमेरिकाले के भन्यो ?
लेबनान र इजरायलबिचको पछिल्लो तनावलाई लिएर अमेरिकाले पनि प्रतिक्रिया दिएको छ । ह्वाइट हाउसले जारी गरेको विज्ञप्तिमा राष्ट्रपति जो बाइडेनले पछि घटनाक्रमको निगरानी गरिरहेको भनिएको छ । उनी साँझदेखि नै राष्ट्रिय सुरक्षा टोलीसँग सम्पर्कमा छन् ।
राष्ट्रपति बाइडेनको निर्देशनमा, वरिष्ठ अमेरिकी अधिकारीहरू इजरायलमा आफ्ना समकक्षहरूसँग निरन्तर सम्पर्कमा रहेको पनि बताइएको छ । ह्वाइट हाउसले जारी गरेको विज्ञप्तिमा भनिएको छ, ‘हामी इजरायलको रक्षा र क्षेत्रमा स्थायित्व ल्याउने काममा सहयोग गर्न जारी राख्नेछौँ।’
को हो हिजबुल्लाह ?
हिजबुल्लाह लेबनानमा इरानद्वारा समर्थित एक शिया इस्लामिक राजनीतिक पार्टी र अर्धसैनिक संगठन हो। सन् १९९२ देखि शेख हसन नसरल्लाहले यसको नेतृत्व गर्दै आएका छन् ।
यस नामको अर्थ अल्लाहको समूह हो। हिजबुल्लाह सन् १९८० को दशकको प्रारम्भमा लेबनानमा इजरायलको कब्जामा इरानको आर्थिक र सैन्य सहयोगमा खडा भएको थियो। हिजबुल्लाहका नेता नसरल्लाहले समूहसँग १०,००,००० लडाकुहरू रहेको दाबी गरेका छन् । यद्यपि स्वतन्त्र अनुमानहरूले सङ्ख्या २०,००० र ५०,००० बिचमा राखेका छन्।
हमासले दक्षिणी इजरायलमा आक्रमण गरेपछि इजरायल र हिजबुल्लाहबिच सीमापार गोलीबारी सुरु भएको थियो । हमासको आक्रमणमा १२ सय मानिस मारिएका थिए भने २४० जनालाई बन्धक बनाइएको थियो । त्यसपछि इजरायलले गाजामा आक्रमण गरेको थियो । हमासको स्वास्थ्य मन्त्रालयका अनुसार हमलामा हालसम्म ४० हजारभन्दा बढी मानिस मारिएका छन् ।
हिजबुल्लाहमाथि वर्षौँदेखि इजरायली र अमेरिकी लक्ष्यहरूलाई लक्षित गरी बम विस्फोट र षड्यन्त्र गरेको आरोप लगाइएको छ। पश्चिमी देशहरू, इजरायल, अरब देशहरू र अरब लिगले हिजबुल्लाहलाई ‘आतङ्कवादी’ संगठन मान्छन्।
