कैलाश महतोले गरे ‘स्वाधीन मधेस जनअभियान’ गठन

डा.सीके राउत नेतृत्वको जनमत पार्टीबाट अलग भएका प्रभावशाली नेता कैलाश महतोले ‘स्वाधीन मधेस जनअभियान’ गठन गरेका छन् ।
जनकपुरमा आइतबार पत्रकार सम्मेलन गरी नेता महतोले जनअभियानको घोषणा गरेका हुन् ।
अलग मधेस देशका लागि संघर्ष गर्दा पटक–पटक मुद्दा उठाएका महतोले अब नेपालभित्रै स्वतन्त्रता खोजिने बताएका छन् ।
‘स्वतन्त्रता भनेको भूमिको स्वतन्त्रता होइन’, उनले भने, ‘मधेसी जनतामाथि राज्यद्वारा लादिएको दोहन, शोषण, अन्याय, अत्याचार, भ्रष्टाचार, दुरुचार र अनियमितताबाट हुने पूर्ण मुक्ति नै स्वतन्त्रता हो ।’
उनले भने, ‘मधेसले चाहेको सोही मुक्ति र स्वतन्त्रतालाई मधेसी जनताले स्वाधीनता मानेको छ ।’
‘स्वाधीन मधेस जनअभियान’ एक स्वतन्त्र राजनीतिक अभियान भएको भन्दै यसले राष्ट्र (जनता) मुक्तिको वकालत गर्ने महतोले बताए । उनले भने, ‘यो अभियान एक बोद्धिक, बैचारिक र भौतिक आन्दोलन पनि हो ।’
मधेससँग राज्यले विभिन्न समयमा गरेको सम्झौताको कार्यान्वयण र मधेसका लागि गद्दार गरेकाहरूको भण्डाफोर यो अभियानले गर्ने उनको भनाई छ ।
संयोजक महतोले काठमाडौं र मधेसबीच समानतामा आधारित राजनीतिक, आर्थिक, सामरिक, प्रशासनिक र शासकीय सम्बन्ध स्थापित हुनुपर्ने सहितका ५० बुँदे राजनीतिक अवधारणा समेत सार्वजनिक गरेका हुन् ।
मधेसको जल, जंगल र जमीनको रक्षा तथा पर्यावरणको सुरक्षा गर्नुपर्ने माग समेत गरेका छन् ।
राजनीतिक अवधारणामा राजनीतिकर्मीका लागि उमेर हदको सीमा लागू गर्नुपर्ने, देश वैदेशिक ऋण मुक्त हुनुपर्ने, कृषिको व्यावसायिकरण तथा हरेक घरमा कम्तिमा एक जनालाई रोजगारको व्यवस्था गर्नुपर्ने सहितमा मुद्दा समेटिएको छ ।
जनअभियानको कार्यसमितिमा नेता महतोले रमेश सिंह (महोत्तरी), संजयकुमार साह (पर्सा), सतिला यादव (सिरहा), ध्रुवप्रसाद कहार (नवलपरासी), महेन्द्रप्रसाद चौधरी (कैलाली), हकिकुल्लाह मुसलमान (कपिलवस्तु), दिनेशप्रसाद यादव (बारा)लाई राखेका छन् ।
अभियानको कार्यसमितिमा देवकान्त सिंह (सिरहा), सुजित कुशवाहा (बारा), अनवर खान (बाँके), जगरनाथ साहनी (रुपन्देही), प्रवीण महतो (मोरङ) र नारदमुनि मण्डल (सप्तरी) रहेको महतोले बताएका छन् ।
डा.राउतसँग मतभेद भएपछि महतोले जनमत पार्टी छाडेका थिए । पार्टी छाडेपछि महतोले जनअभियान गठन गरेका छन् । योसँगै डा.राउतको पार्टी दुई टुक्रा भएको छ । डा.राउतलाई महतोले झट्का दिएका छन् ।
कुनै बेला महतो डा.राउतको सबैभन्दा विश्वासपात्र मानिन्थे । अहिले डा.राउत र महतोबीच पानीबाराबारको अवस्था छ । टप नेपाल