गोपाल , महोत्तरी, फागुन १ गते
महोत्तरी निर्वाचन क्षेत्र नं. ३ मा राष्ट्रिय स्वतन्त्र पार्टी –रास्वपा- ले आफ्नो संगठन विस्तारलाई तीव्र बनाउँदै आज शुक्रबार जलेश्वरमा बृहत् पार्टी प्रवेश कार्यक्रम सम्पन्न गरेको छ । विभिन्न राजनीतिक दल परित्याग गरी करिब ५०० जना नेता–कार्यकर्ता र समर्थकहरू रास्वपामा औपचारिक रूपमा प्रवेश गरेका हुन् ।
कार्यक्रममा पार्टीका केन्द्रीय सदस्य तथा प्रवक्ता मनिष झा प्रमुख अतिथिका रूपमा उपस्थित भएका थिए । साथै महोत्तरी–३ का प्रतिनिधिसभा सदस्य उम्मेदवार ई.उज्वल झा सहित जिल्ला तथा क्षेत्रीय तहका नेताहरूको उल्लेख्य उपस्थिति रहेको थियो ।
रास्वपामा प्रवेश गर्नेहरूमा नेपाल कम्युनिस्ट पार्टी –नेकपा – का केन्द्रीय सदस्य विजय चौधरी, जनता समाजवादी पार्टी –जसपा – जलेश्वर नगर अध्यक्ष सन्तोष साह, नेपाली कांग्रेस का महासमिति सदस्य श्रीचन महासेठ, एकडारा गाउँपालिकाका पूर्व पालिका अध्यक्ष रामछविला साह लगायत रहेका छन् ।
उक्त व्यक्तित्वहरूको प्रवेशलाई स्थानीय राजनीतिक वृत्तमा महत्वपूर्ण रूपमा हेरीएको छ । आयोजकका अनुसार विभिन्न वडाबाट आएका युवा, महिला तथा सामाजिक अभियन्ताहरूले पनि सामूहिक रूपमा पार्टीमा आबद्धता जनाएका छन् ।
कार्यक्रमलाई सम्बोधन गर्दै प्रवक्ता मनिष झाले देशको वर्तमान राजनीतिक अवस्थाप्रति जनताको निराशा बढ्दै गएको उल्लेख गरे । उनले सुशासन, पारदर्शिता र जवाफदेहितालाई केन्द्रमा राखेर रास्वपाले राजनीतिक अभियान अघि बढाइरहेको बताए ।
“अब पुराना शैलीको राजनीति होइन, परिणाममुखी र जिम्मेवार राजनीति आवश्यक छ,” उनले भने, “महोत्तरी–३ मा देखिएको उत्साहले परिवर्तनको चाहना स्पष्ट पारेको छ ।”
महोत्तरी ३ का उम्मेदवार उज्वल झाले महोत्तरी–३ का विकास, शिक्षा, स्वास्थ्य, कृषि तथा रोजगारीका मुद्दालाई प्राथमिकतामा राख्ने प्रतिबद्धता व्यक्त गरे । उनले स्थानीय स्तरका समस्यालाई संघीय संसदसम्म सशक्त रूपमा उठाउने अठोट व्यक्त गर्दै नवप्रवेशीहरूलाई संगठन सुदृढीकरणमा सक्रिय भूमिका खेल्न आग्रह गरे ।
बृहत् पार्टी प्रवेश कार्यक्रमलाई महोत्तरी–३ को चुनावी गतिविधिको सुरुवाती संकेतका रूपमा हेरिएको छ । पछिल्ला दिनहरूमा विभिन्न दलबीच प्रतिस्पर्धा बढ्दै गइरहेका बेला रास्वपाको यो कार्यक्रमले क्षेत्रीय राजनीतिक समीकरणमा नयाँ तरंग ल्याएको स्थानीय विश्लेषकहरूको भनाइ छ ।
कार्यक्रममा नवप्रवेशीहरूलाई खादा तथा टीका लगाएर स्वागत गरिएको थियो । उपस्थित सहभागीहरूले परिवर्तन, सुशासन र नयाँ राजनीतिक संस्कृतिको पक्षमा एकजुट हुने प्रतिबद्धता व्यक्त गरेका थिए ।
