हेटौँडा। मकवानपुरको भीमफेदीमा भएको ईभी दुर्घटनामा परी ज्यान गुमाएका १३ जनाको शव आज आफन्तले बुझेका छन्। प्रशासनले पीडित पक्षका माग सम्बोधनका लागि सात दिनभित्र पहल गर्ने सहमति जनाएपछि पोस्टमार्टम प्रक्रिया पूरा गरी शव आफन्तलाई हस्तान्तरण गरिएको हो।
शव बुझेसँगै आफन्तहरूले मृतकहरूको शव आजै सर्लाहीस्थित आफ्नो गाउँ पुर्याएर धार्मिक परम्पराअनुसार अन्त्येष्टि गर्ने तयारी गरेका छन्।
दुर्घटनामा एकै परिवारका ६ जनासहित कुल १४ जनाले ज्यान गुमाएका थिए। एकै परिवारका धेरै सदस्य गुमाउनुपर्दा परिवारजनमाथि ठूलो बज्रपात परेको छ भने यस घटनाले सिंगो गाउँलाई शोकमा डुबाएको छ।
दुर्घटनापछि पीडित परिवार तथा आफन्तले विभिन्न माग राख्दै शव बुझ्नुअघि प्रशासनसँग छलफल गरेका थिए। प्रशासनले उनीहरूका माग सम्बोधनका लागि सात दिनभित्र आवश्यक पहल गर्ने सहमति जनाएपछि शव बुझ्ने वातावरण बनेको हो।
एकै दुर्घटनामा ठूलो संख्यामा नागरिकको ज्यान गएपछि स्थानीय क्षेत्रमा शोकको वातावरण छाएको छ। मृतकप्रति श्रद्धाञ्जली व्यक्त गर्दै शोकसन्तप्त परिवारजनमा आफन्त, छरछिमेकी तथा स्थानीयवासीले समवेदना व्यक्त गरिरहेका छन्।
