‎बरहथवामा प्रदर्शनमा संलग्न चार जना स्थानीयको सक्रियतामा प्रहरीको जिम्मा लगाइयो

मलंगवा, साउन १५ । सर्लाहीको बरहथवा बजारमा शुक्रबार भएको प्रदर्शनका क्रममा सहभागी चार जनालाई जनप्रतिनिधि, स्थानीयवासी तथा व्यापारीहरूको सक्रिय पहलमा नियन्त्रणमा लिएर प्रहरीको जिम्मा लगाइएको छ।
‎इलाका प्रहरी कार्यालय बरहथवाका डीएसपी गोपीकृष्ण सुवेदीका अनुसार मोटरसाइकलमार्फत बाहिरबाट आएका ती व्यक्तिहरूले बजार क्षेत्रमा प्रदर्शन गरेका थिए। प्रारम्भिक जानकारीअनुसार उनीहरू स्थानीय बासिन्दा नभएको खुलेको छ।
‎बजार क्षेत्रमा लुटपाट, तोडफोड वा अन्य अवाञ्छित गतिविधि हुन सक्ने आशंकापछि जनप्रतिनिधि, स्थानीयवासी र व्यापारीहरूले समन्वय गरी चारै जनालाई नियन्त्रणमा लिई इलाका प्रहरी कार्यालय बरहथवामा बुझाएका हुन्।
‎प्रहरीले घटनाबारे आवश्यक अनुसन्धान सुरु गरिसकेको जनाएको छ। नियन्त्रणमा लिइएका व्यक्तिहरूमाथि घटनाको प्रकृति र संलग्नताबारे थप अनुसन्धान भइरहेको डीएसपी सुवेदीले जानकारी दिए।
‎बरहथवा बजारको शान्ति–सुरक्षा, सामाजिक सद्भाव तथा जनधनको सुरक्षालाई प्राथमिकतामा राख्दै जनप्रतिनिधि, स्थानीयवासी, व्यापारी र सुरक्षाकर्मीबीच भएको समन्वयलाई सकारात्मक रूपमा हेरिएको छ।