गुलरिया : बर्दियामा २१ किलो बढी अफिमसहित २ जना पक्राउ परेका छन्। पक्राउ पर्नेमा जाजरकोटको नलगाड नगरपालिका-७ का ३७ वर्षीय भक्तबहादुर शाही र चितवनको राप्ती नगरपालिका-११ आरपानीका २७ वर्षीय कुमार वाइबा रहेका छन्।
लागुऔषध अफिम लुकाई छिपाई नेपालगन्ज तर्फ लैजाँदै गरेको अवस्थामा प्रहरी चौकी चेपाङबाट खटिएको टोलीले बर्दियाको बाँसगढी नगरपालिका-१ चेपाङ स्थित रत्नमार्ग सडकखण्डबाट पक्राउ गरेको हो।
लु ८० प १४६७ नम्बरको मोटरसाइकल चेकजाँच गर्ने क्रममा चालक शाही र सोही मोटरसाइकलमा सवार वाइबालाई अफिमसहित नियन्त्रणमा लिएको जिल्ला प्रहरी कार्यालयका प्रहरी नायब उपरीक्षक चक्र बहादुर डमरपालले बताए।
चेकजाँचका क्रममा कालो प्लाष्टिकको झोला भित्र २२ वटा पोका बनाइएको २१ केजी ५६७ ग्राम अफिम फेला परेको थियो।
बर्दिया जिल्ला अदालतबाट ५ दिनको म्याद थप गरी अनुसन्धान भइरहेको प्रहरीले जनाएको छ।
