जसपा कार्यकारिणी बैठकमा सात एजेन्डामा छलफल हुँदै, कोरोनाका कारण प्रशिक्षण तालिका स्थगित

पार्टी एकीकरणपछि पहिलो पटक बसिरहेको जनता समाजवादी पार्टीको केन्द्रीय कार्यकारणी बैठकमा बिहीबारदेखि सात वटा एजेन्डामा छलफल सुरु भएको छ ।
लिलितपुरको बालकुमारीस्थित पार्टी कार्यालय नजिकै रहेको एक सभाहलमा बुधबारदेखि चलेको बैठकमा बिहीबारदेखि भने एजेण्डामा छलफल हुने भएकाे हाे ।
बुधबार अध्यक्षद्धय महन्थ ठाकुर र उपेन्द्र यादवले उक्त एजेन्डाहरु प्रस्तुत गरेका थिए । बिहीबारदेखि ती एजेन्डाहरु माथि छलफल सुरु गरिएको नेता बृषेशचन्द्र लालले जानकारी दिए ।
जपसाको पहिलो बैठकमा पार्टीको समायोजनसम्बन्धी निर्देशिका, आचार एवं व्यवहारसम्बन्धी आचार संहिता, वर्तमान परिस्थती र हाम्रो दायित्व, कार्यकारी समितिको कार्य विभाजन, संगठनात्मक कार्य योजना, समसमायीक प्रस्ताव र विविध शिर्षकमा गरी तय गरिएको एजेण्डामा विस्तृत छलफल हुने उनले जानकारी दिए ।
सबै एजेन्डाहरुमाथि कार्यकारणी समितिका सदस्यहरुले विचार राखेपछि त्यसलाई पारित गर्ने कार्यक्रम रहेको उनले बताए ।
सुरुमा पहिलो बैठक भएकाले चार दिनसम्म प्रशिक्षण चलाउने र त्यसपछिको दुई दिन बैठक गर्ने कार्यतालिका जसपाले सार्वजनिक गरेको थियो ।
तर पछिल्लो समयमा कोरोना संक्रमणका बढन थालेकाले बैठकलाई छोट्याइएको जनाइएको छ ।
अहिले प्रशिक्षण स्थगित गरेर सिधै एजेण्डामाथि छलफल गर्न लागिएको पार्टीले जनाएको छ । सभार नायाँ पत्रिका