मिर्चैया, सिरहा।
मिर्चैया नगरपालिकामा अग्रगामी मोर्चाको आगामी प्रथम चरणको संघर्ष तथा चेतनामूलक कार्यक्रमहरूको रूपरेखा तय गर्न एक महत्त्वपूर्ण बैठक सम्पन्न भएको छ। जनता समाजवादी पार्टी (जसपा) नेपालका जिल्ला कार्यकारिणी सदस्य अजय यादवको निजी निवासमा उक्त बैठक आयोजना गरिएको हो।
बैठकमा मिर्चैया नगरपालिका क्षेत्रभित्र मोर्चालाई सांगठनिक रूपमा थप मजबुत बनाउने र जनताका समसामयिक मुद्दाहरूलाई सम्बोधन गर्न आगामी दिनमा चालिने प्रथम चरणका कार्यक्रमहरूबारे सरोकारवालाहरूबीच सघन छलफल भएको थियो।
छलफलमा निम्नबमाेजिमका कार्यक्रम गरिने बारे कुराकानी गरिएकाे छ ।
प्रथम चरणको कार्यक्रम तय: मोर्चाको उद्देश्य र एजेन्डालाई जनस्तरसम्म पुर्याउन पहिलो चरणमा गरिने अन्तरक्रिया, कोणसभा र विरोधका कार्यक्रमहरूको खाका तयार गरिएको छ।
सांगठनिक सुदृढीकरण: स्थानीय स्तरमा मोर्चाको प्रभाव विस्तार गर्न र संगठनलाई गतिशील बनाउन रणनीति तय गरिएको छ।
अधिकार र पहिचानको मुद्दा: उत्पीडित, सीमान्तकृत र स्थानीय समुदायको हकअधिकार सुनिश्चित गर्न मोर्चाले नेतृत्वदायी भूमिका खेल्ने प्रतिबद्धता जनाइएको छ।
बैठकका होस्ट तथा जसपा नेपालका जिल्ला कार्यकारिणी सदस्य अजय यादवले मोर्चाको आगामी अभियानलाई सफल बनाउन स्थानीय स्तरबाट पूर्ण सहयोग रहने र जनताको अधिकार प्राप्तिको लडाइँमा मोर्चा अग्रपंक्तिमा उभिने विश्वास व्यक्त गर्नुभयो। बैठकमा मोर्चा आबद्ध विभिन्न राजनीतिक दलका नेता, स्थानीय अगुवा तथा कार्यकर्ताहरूको उल्लेख्य उपस्थिति रहेको थियो।
