मधेशका मुख्यमन्त्री कृष्णप्रसाद यादवले कात्तिक २८ गते विश्वासको मत लिने

जनकपुरधाम । मधेश प्रदेशका मुख्यमन्त्री कृष्णप्रसाद यादवले आगामी कात्तिक २८ गते प्रदेशसभाबाट विश्वासको मत लिने भएका छन्।
मुख्यमन्त्री यादवले कात्तिक २८ गते दिउँसो १ बजे प्रदेशसभा बैठकमा विश्वासको मत लिने कार्यक्रम तय भएको जानकारी उनका प्रेस सल्लाहकार सुरेश यादवले सामाजिक सञ्जालमार्फत सार्वजनिक गरेका छन्।
मधेश प्रदेश सरकारलाई समर्थन गर्दै आएका नेकपा (एमाले) र नेकपा (माओवादी केन्द्र) ले समर्थन फिर्ता लिएपछि मुख्यमन्त्री यादवले प्रदेशसभाबाट विश्वासको मत लिनुपर्ने संवैधानिक अवस्था सिर्जना भएको हो।
समर्थन फिर्तापछि सरकारको स्थायित्व र आगामी राजनीतिक समीकरणलाई लिएर मधेश प्रदेशको राजनीतिक वृत्तमा चासो बढेको छ। मुख्यमन्त्री यादवले विश्वासको मत प्राप्त गर्न आवश्यक प्रदेशसभा सदस्यहरूको समर्थन जुटाउनुपर्ने चुनौती देखिएको छ।
अब कात्तिक २८ गते हुने विश्वासको मतसम्बन्धी मतदानले मधेश प्रदेश सरकारको आगामी राजनीतिक दिशा र स्थायित्वको टुंगो लगाउनेछ।