होत्तरी, २०८३ कार्तिक २२ गते।
महोत्तरीको रामगोपालपुर नगरपालिकाले वर्षौंदेखि भाडाको भवनबाट सञ्चालन हुँदै आएको कार्यालय अब आफ्नै नवनिर्मित प्रशासनिक भवनबाट सञ्चालनमा ल्याएको छ। लक्ष्मीपूजाको शुभ अवसर पारेर एक विशेष समारोहबीच नगरपालिकाको नयाँ प्रशासनिक भवनको उद्घाटन गरिएको हो।
नयाँ भवनको उद्घाटनसँगै नगरपालिकाले लामो समयदेखि व्यहोर्दै आएको घरभाडाको आर्थिक भारबाट मुक्ति पाउने भएको छ। कार्यालय सञ्चालनका लागि वर्षेनी लाखौँ रुपैयाँ भाडामा खर्च हुँदै आएकोमा अब उक्त रकम बचत हुने नगरप्रमुख रामदुलार साहले बताएका छन्।
उद्घाटन कार्यक्रममा बोल्दै नगरप्रमुख साहले आफ्नै प्रशासनिक भवन निर्माण हुनु नगरपालिकाका लागि महत्वपूर्ण उपलब्धि भएको उल्लेख गर्दै यसले नगरपालिकाको आर्थिक भार कम गर्नुका साथै सेवा प्रवाहलाई थप व्यवस्थित र प्रभावकारी बनाउने विश्वास व्यक्त गरे।
त्यस्तै, मधेश प्रदेशका पूर्वमुख्यमन्त्री एवं प्रदेशसभा सदस्य सरोज कुमार यादवले लक्ष्मीपूजाको पावन अवसरमा नयाँ प्रशासनिक भवन उद्घाटन हुनु नगरवासीका लागि खुसीको विषय भएको बताए। आफ्नै भवनबाट कार्यालय सञ्चालन हुँदा सेवाग्राहीलाई सहज हुने, कर्मचारीलाई काम गर्न अनुकूल वातावरण मिल्ने र नगरपालिकाको प्रशासनिक कार्यसम्पादन थप प्रभावकारी बन्ने उनले धारणा व्यक्त गरे।
नयाँ भवन सञ्चालनमा आएसँगै नगरवासीले विभिन्न प्रशासनिक तथा विकास निर्माणसम्बन्धी सेवा एउटै स्थानबाट सहज रूपमा प्राप्त गर्न सक्ने अपेक्षा गरिएको छ।
वर्षौंदेखि भाडाको भवनमा निर्भर रहँदै आएको रामगोपालपुर नगरपालिकाले आफ्नै प्रशासनिक भवन प्राप्त गर्नु संस्थागत विकास र पूर्वाधार निर्माणको दृष्टिले महत्वपूर्ण उपलब्धि मानिएको छ। यसले नगरपालिकाको आर्थिक बचतसँगै सुशासन, पारदर्शिता र नागरिकमैत्री सेवा प्रवाहमा समेत सकारात्मक योगदान पुर्याउने विश्वास गरिएको छ।
