गोपाल झा महोत्तरी, साउन ११ गते ।
मधेश प्रदेश सरकार, स्वास्थ्य तथा जनसंख्या मन्त्रालय अन्तर्गत स्वास्थ्य निर्देशनालयको प्रादेशिक आयुर्वेद तथा होमियोप्याथिक -वैकल्पिक_ चिकित्सालय, जलेश्वरमा सञ्चालन भइरहेको होमियोप्याथिक उपचार सेवाप्रति पछिल्ला दिनमा बिरामीहरूको विश्वास उल्लेखनीय रूपमा बढ्दै गएको छ । एलोपेथिक उपचारसँगै वैकल्पिक चिकित्सा होमियोपैथ पद्धतिप्रति नागरिकको आकर्षण बढ्दै जाँदा जलेश्वरका स्थानीयवासी मात्र नभई महोत्तरीका विभिन्न स्थानीय तह तथा छिमेकी जिल्लाबाट समेत उपचारका लागि बिरामीहरू आउने क्रम निरन्तर बढिरहेको छ ।
चिकित्सालयमा विगत दुई वर्षदेखि सेवा दिँदै आउनुभएका होमियोपैथ डा. गुणानन्द साहका अनुसार हाल दैनिक औसत २० देखि ३० जना बिरामीले होमियोप्याथिक उपचार सेवा लिइरहेका छन् । पछिल्लो समय दीर्घरोग तथा पटक–पटक दोहोरिने स्वास्थ्य समस्याबाट पीडित बिरामीहरूको संख्या उल्लेखनीय रूपमा बढेको उहाँ बताउनुहुन्छ ।
डा. साहले भन्नुभयो, “पछिल्ला केही वर्षयता होमियोप्याथिक उपचारप्रति नागरिकको विश्वास निरन्तर बढिरहेको छ । दैनिक २० देखि ३० जना बिरामी उपचारका लागि आउने गरेका छन् । धेरैजसो बिरामी दीर्घकालीन रोग, एलर्जी, छालासम्बन्धी समस्या, माइग्रेन, जोर्नी दुखाइ, ग्यास्ट्रिक, दम, बालबालिकाका केही स्वास्थ्य समस्या तथा महिलासम्बन्धी विभिन्न समस्याको उपचारका लागि आउने गर्नुहुन्छ । नियमित उपचारपछि स्वास्थ्यमा सुधार भएको अनुभव सुनाउँदै उनीहरूले अन्य बिरामीलाई पनि सेवा लिन प्रेरित गरिरहनुभएको छ, जसले सेवाप्रतिको विश्वास अझ मजबुत बनाएको छ ।
उहाँका अनुसार होमियोप्याथिक उपचारमा रोगको लक्षण मात्र हेर्ने नभई बिरामीको सम्पूर्ण शारीरिक, मानसिक तथा जीवनशैलीसम्बन्धी अवस्थाको विस्तृत अध्ययन गरी औषधि छनोट गरिने भएकाले उपचार थप प्रभावकारी हुने विश्वास गरिएको छ । बिरामीसँग पर्याप्त समय दिएर परामर्श गर्ने, उपचारको प्रकृति बुझाउने तथा नियमित अनुगमन गर्ने अभ्यासले पनि सेवाग्राहीको सन्तुष्टि बढाएको उहाँको भनाइ छ ।
चिकित्सालयमा उपचार गराउन आउने बिरामीहरूका अनुसार होमियोप्याथिक औषधिको साइड इफेक्ट न्यून हुने, उपचार प्रक्रिया सहज र सरल हुने तथा चिकित्सकबाट व्यक्तिगत रूपमा पर्याप्त परामर्श पाउने भएकाले उनीहरू यस उपचार पद्धतिप्रति आकर्षित भएका हुन् । विशेषगरी लामो समयदेखि एलोपेथिक उपचारबाट अपेक्षित सुधार नभएका केही बिरामीले होमियोप्याथिक उपचारपछि सकारात्मक अनुभव प्राप्त गरेको बताएका छन् ।
चिकित्सकका अनुसार पछिल्लो समय स्वास्थ्यप्रति नागरिकमा चेतना वृद्धि भएसँगै सुरक्षित, प्रभावकारी तथा दीर्घकालीन उपचार पद्धतिप्रति रुचि बढेको छ । नयाँ बिरामीको संख्या बढ्नुका साथै उपचारपछि स्वास्थ्यमा सुधार आएको अनुभव गरेका पुराना बिरामीहरूले पनि आफ्ना आफन्त तथा समुदायका अन्य व्यक्तिलाई सेवा लिन सुझाव दिने गरेका छन् ।
ग्रामीण क्षेत्रका नागरिकका लागि समेत सहज पहुँचमा रहेको यो सेवाले वैकल्पिक चिकित्सा प्रणालीलाई थप विश्वासिलो बनाउँदै लगेको डा. साहको विश्वास छ । यहाँका उपचार निःशुल्क हुनु, आवश्यक औषधि तथा परामर्श उपलब्ध हुनु र दीर्घरोगका बिरामीको नियमित फलोअप गरिनुले सेवाको प्रभावकारिता बढाएको छ ।
स्थानीय बुद्धिजीवी तथा स्वास्थ्य सरोकारवालाहरूले होमियोप्याथिक सेवाप्रति बढ्दो जनविश्वासलाई दीगो बनाउन गुणस्तरीय सेवा, दक्ष जनशक्ति, आवश्यक औषधिको नियमित उपलब्धता, आधुनिक व्यवस्थापन तथा सेवा विस्तारमा थप ध्यान दिनुपर्ने सुझाव दिएका छन् । यसबाट वैकल्पिक होमियोपैथ चिकित्सा सेवाप्रति नागरिकको भरोसा अझ सुदृढ हुने बिरामीहरुको विश्वास छ । 
जलेश्वरस्थित प्रादेशिक आयुर्वेद तथा होमियोप्याथिक -वैकल्पिक_ चिकित्सालयले उपचार सेवासँगै स्वास्थ्यसम्बन्धी परामर्श, रोगबारे जनचेतनामूलक कार्यक्रम तथा स्वस्थ जीवनशैली अपनाउन प्रेरित गर्ने गतिविधिलाई पनि प्राथमिकताका साथ सञ्चालन गर्नुपर्ने आबस्यक रहेको जनाएको छ । यसले समुदायमा स्वास्थ्य सचेतना अभिवृद्धि गर्नुका साथै वैकल्पिक चिकित्सा सेवाको प्रभावकारिता बढाउन महत्वपूर्ण योगदान पुर्याउने अपेक्षा गरिएको छ ।
समग्रमा, जलेश्वरस्थित होमियोप्याथिक उपचार सेवाप्रति बिरामीहरूको बढ्दो विश्वासले वैकल्पिक चिकित्सा प्रणालीप्रतिको आकर्षण दिनप्रतिदिन विस्तार हुँदै गएको देखिएको छ । गुणस्तरीय सेवा, बिरामीमैत्री व्यवहार, प्रभावकारी उपचार तथा नियमित अनुगमनलाई निरन्तरता दिन सकिए आगामी दिनमा यस सेवाको पहुँच र लोकप्रियता अझ व्यापक हुने अपेक्षा गरिएको छ ।
