तेल अभिभ । गाजापट्टीमा ६ जना इजरायली बन्दीको शव भेटिएको इजरायली सेनाले बताएको छ । इजरायल रक्षा बल (आईडीएफ)ले जारी गरेको विज्ञप्ति अनुसार यागेभ बुच्श्ताब, आलेक्जान्डर ड्यान्सिग, अवराहम मन्देर, योराम मेत्जेगर, हाइम पेरी र बेलायती–इजरायली नागरिक नादेभ पोपलवेलको शव भेटिएको हो ।
यी सबैको शव सोमबार खान युनिस क्षेत्रमा भेटिएको समाचारमा उल्लेख छ।
अवराहम मन्देरबाहेक पाँच जनाको मृत्यु भइसकेको यसअघि नै इजरायलले घोषणा गरिसकेको थियो । मन्देरको भने खोजीकार्य जारी थियो ।
आईडीएफले सुरक्षा एजेन्सी शिन बेटसँग मिलेर खोजी कार्य गरिरहेको थियो । हमासले अक्टोबर ७ मा दक्षिणी इजरायलमा आक्रमण गरेर करिब २५० जनालाई बन्दी बनाएको थियो । यी छ जना पनि अक्टोबर ७ मै अपहरणमा परेका थिए । गाजामा हमासको कब्जामा अब १०९ इजरायली बन्दी बाँकी रहेको बताइएको छ ।
