काठमाडौं, चैत १३ । नेपाल विद्युत प्राधिकरणका निवर्तमान कार्यकारी निर्देशक कुलमान घिसिङले आफूलाई गैरकानुनी रुपमा पदमुक्त गरिएको जिकिरसहित सर्वोच्च अदालतमा रिट दायर गरेका छन् ।
उनले आफूलाई पदमुक्त गर्ने मन्त्रिपरिषद्को निर्णय बदर गरी प्राधिकरणको कार्यकारी निर्देशक (एमडी) मा पुनस्र्थापना गर्न माग गरेका छन् । सरकारले बदनियत राखेर आफूमाथि पटक–पटक स्पष्टीकरण सोधेको र गलत ढंगले पदमुक्त गरेको उनको जिकिर रहेको छ ।
घिसिङले नेपाल सरकार, उर्जा तथा जलस्रोत मन्त्रालय, नेपाल विद्युत प्राधिकरणका नवनियुक्त कार्यकारी निर्देशकलगायतलाई विपक्षी बनाएका छन् । गत सोमबार बसेको मन्त्रिपरिषद् बैठकले घिसिङलाई पदमुक्त गरेको थियो ।
उनको स्थानमा सरकारले हितमान शाक्यलाई नियुक्त गरेको छ । शाक्य मंगलवार नै पदभार ग्रहण गरि सकेका छन ।
सरकारले कुलमानलाई हटाउने सम्बन्धमा गरेको निर्णयको व्यापक विरोध भई रहेको छ । कुलमान कै विषयलाई लिएर प्रतिपक्षीदलले बुधवार दुबै सदन अवरुद्ध गरेका छन । प्रतिपक्षीहरुले कुलमान हटाउने निर्णय बारे प्रधानमन्त्रीले जवाव नदिए सम्म सदन चल्न नदिने अडान लिएका छन ।
