नवनिर्वाचित प्रधानमन्त्री पुष्पकमल दाहाल प्रचण्डले आफूसँगै ८ मन्त्री नियुक्त गर्दा जनता समाजवादी पार्टी (जसपा) बाट कसैलाई पनि समेटेनन् ।
प्रधानमन्त्री प्रचण्डले एमाले, माओवादी केन्द्र र राष्ट्रिय स्वतन्त्र पार्टीबाट तीन उपप्रधानमन्त्री सहित आठ सदस्यीय मन्त्रिपरिषद् गठन गरेका छन् । तीन उपप्रधानमन्त्रीमध्ये विष्णुप्रसाद पौडेल अर्थ, नारायणकाजी श्रेष्ठ भौतिक पूर्वाधार र रवि लामिछानेले गृह मन्त्रालय सम्हालेका छन् ।
अरु मन्त्रीको मन्त्रालय तोकिन बाँकी छ । तर सरकारलाई समर्थन गरेको जसपाबाट पहिलो चरणमा कोही पनि मन्त्री बनेका छैनन् । जसपाका नेता रामसहाय यादवले पार्टीभित्रै मन्त्री छनोट गर्न बाँकी रहेकाले पहिलो चरणमा नपठाएको बताए । ‘प्रधानमन्त्रीको शपथ कार्यक्रममै छौं, तर पार्टीभित्र छलफल हुन बाँकी भएकाले मन्त्री पठाएका छैनौं’, यादवले भने ।
जसपाले संसदीय दलको नेता नै चयन गर्न बाँकी छ । अध्यक्ष उपेन्द्र यादवले चुनाव जित्न सकेका छैनन् । राष्ट्रिय परिषद् अध्यक्ष अशोक राईले भने चुनाव जितेका छन् । तर जसपाले दलको नेताबारे निर्णय लिन बाँकी छ ।
