महोत्तरी, २०८३ कार्तिक २५।
महोत्तरीमा नेकपा (एमाले) को राजनीतिक शक्ति थप बलियो बन्दै गएको छ। पिपरा गाउँपालिकाका पूर्व निर्वाचित अध्यक्ष विक्रम चौधरीसहित जनता समाजवादी पार्टी (जसपा) नेपाल परित्याग गरी दर्जनभन्दा बढी नेता तथा कार्यकर्ता नेकपा (एमाले) मा प्रवेश गरेका छन्।
मधेश प्रदेशका पूर्व मुख्यमन्त्री तथा प्रदेशसभा सदस्य सरोज कुमार यादवको प्रमुख आतिथ्यमा आयोजित पार्टी प्रवेश कार्यक्रममा चौधरीसहित विभिन्न तहका नेता तथा कार्यकर्ताले एमालेको सदस्यता ग्रहण गरेका हुन्।
नवप्रवेशी नेता तथा कार्यकर्तालाई पूर्व मुख्यमन्त्री यादवले पार्टीमा स्वागत गर्दै उनीहरूको आगमनले महोत्तरीमा एमालेको संगठन थप सुदृढ हुने विश्वास व्यक्त गर्नुभयो।
उहाँले पार्टीको नीति, सिद्धान्त र विचारलाई आत्मसात् गर्दै जनताको पक्षमा इमानदारीपूर्वक काम गर्न नवप्रवेशीहरूलाई आग्रह गर्नुभयो। साथै, जनताको विश्वास जित्ने गरी संगठन विस्तार र विकास निर्माणका काममा सक्रिय हुनुपर्नेमा जोड दिनुभयो।
पिपरा गाउँपालिकाका पूर्व निर्वाचित अध्यक्ष विक्रम चौधरीजस्तो स्थानीय तहमा अनुभव प्राप्त नेतृत्व एमालेमा प्रवेश गर्नुलाई जिल्लाको राजनीतिक वृत्तमा अर्थपूर्ण रूपमा हेरिएको छ।
पार्टी प्रवेशसँगै महोत्तरीमा एमालेको संगठन विस्तार तथा आगामी राजनीतिक गतिविधिमा थप ऊर्जा मिल्ने अपेक्षा गरिएको छ।
