शम्सीमा विश्व मानव बेचबिखन विरुद्ध दिवसको अवसरमा जनचेतनामूलक कार्यक्रम सम्पन्न

महोत्तरी, शम्सी। विश्व मानव बेचबिखन विरुद्ध दिवसको अवसरमा महोत्तरी जिल्लाको शम्सी गाउँपालिका–स्थित शम्सी चोकमा जनचेतनामूलक कार्यक्रम सम्पन्न भएको छ।
प्रहरी चौकी शम्सीको आयोजना तथा स्थानीयवासीको सक्रिय सहभागितामा सम्पन्न कार्यक्रममा मानव बेचबिखन तथा ओसारपसारका जोखिम, त्यसबाट बच्ने उपाय, शंकास्पद गतिविधिको पहिचान तथा समयमै सम्बन्धित निकायमा सूचना दिनुपर्ने विषयमा जानकारी प्रदान गरिएको थियो।
कार्यक्रममा प्रहरीले मानव बेचबिखन समाजका लागि गम्भीर अपराध भएको उल्लेख गर्दै रोजगारी, वैदेशिक अवसर वा अन्य विभिन्न प्रलोभनमा परी अपरिचित व्यक्तिको प्रभावमा नपर्न आग्रह गरेको थियो। साथै, कुनै पनि शंकास्पद गतिविधि देखिएमा तत्काल प्रहरीलाई जानकारी गराई मानव बेचबिखन नियन्त्रण अभियानमा सबैको सहकार्य आवश्यक रहेको बताइएको थियो।
स्थानीय जनप्रतिनिधि, समाजसेवी, युवा तथा सर्वसाधारणको उल्लेखनीय सहभागिता रहेको उक्त कार्यक्रममा मानव बेचबिखनविरुद्ध सामूहिक सचेतना अभिवृद्धि गर्न यस्ता कार्यक्रम प्रभावकारी हुने सहभागीहरूले बताएका छन्।
प्रहरी चौकी शम्सीले आगामी दिनमा पनि समुदाय–प्रहरी साझेदारीलाई थप प्रभावकारी बनाउँदै अपराध नियन्त्रण तथा जनचेतनामूलक कार्यक्रमलाई निरन्तरता दिने जनाएको छ।