विश्व रक्तदाता दिवसको अवसरमा जानकी एकेडेमीद्वारा रक्तदान कार्यक्रम सम्पन्न ८३ जना रक्तदाताले गरे रक्तदान

गोपाल झा
महोत्तरी – जेष्ठ ३१, शनिबार
विश्व रक्तदाता दिवस २०८२ को अवसरमा जानकी एकेडेमी अस्पताल, पर्सा देवाड, महोत्तरीले रक्तदान कार्यक्रमको आयोजना गरी सफलतापूर्वक सम्पन्न गरेको छ ।
नेपाल रेडक्रस सोसाइटीमा देखिएको रक्त अभावलाई मध्यनजर गर्दै आयोजना गरिएको उक्त कार्यक्रममा कुल ८३ जना रक्तदाताहरूले रक्तदान गरेका छन् । कार्यक्रमबारे जानकारी दिँदै अस्पतालका व्यवस्थापक संजय यादवले सबै उमेर समूहका व्यक्तिहरूको उल्लेखनीय सहभागिताले रक्तदानप्रति आम सर्वसाधारणलाई सचेत र जागरुक बनाउने कार्यमा टेवा पुगेको बताएका हुन् ।
       रक्तदान कार्यक्रमको मुख्य आयोजना जानकी एकेडेमी अस्पतालले गरेको थियो भने प्राविधिक सहयोग नेपाल रेडक्रस सोसाइटी, रक्त सञ्चार सेवा केन्द्र जनकपुर, धनुषाको तर्फबाट नारायण न्यौपानेको नेतृत्वमा तीन सदस्यीय टोलीले गरेको थियो ।
      कार्यक्रमको प्रमुख आतिथ्य जनता समाजवादी पार्टी (जसपा) का केन्द्रिय कार्यकारिणी सदस्य तथा पूर्व स्वास्थ्य तथा जनसंख्या मन्त्री डा. सुरेन्द्र यादवले गरेका थिए । कार्यक्रममा महोत्तरी क्षेत्रका विभिन्न सम्मानित व्यक्तित्व, सुरक्ष निकायका ससस्त्र प्रहरी , पत्रकार , स्थानीय अगुवा, स्वास्थ्यकर्मी तथा सर्वसाधारणको उल्लेखनीय उपस्थिति रहेको थियो ।
       रक्तदानको अबसरमा पुर्ब मन्त्री डा. यादवले कार्यक्रममा बोल्दै भने, हाम्रो खेर जाने रगत यदि दान गर्दा कसैको जीवन बाँच्छ भने त्यो भन्दा ठूलो पुण्य र योगदान केही हुन सक्दैन । यही सोचका साथ यो रक्तदान कार्यक्रमको आयोजना गरिएको हो ।
त्यस्तै, पत्रकारहरूसँग कुराकानी गर्दै उनले थपेःहामी सबैको सामूहिक प्रयासले धेरै जनाको जीवन बचाउन सकिन्छ । विश्व रक्तदाता दिवसको यो महत्त्वपूर्ण अवसरमा हामी रक्तदाताको योगदानको उच्च कदर गर्छौं र अरूलाई पनि रक्तदान गर्न प्रेरित गर्दछौं । उनले रक्तदानलाई समाजसेवाको एक अत्यन्तै पवित्र र प्रभावकारी माध्यमको रूपमा व्याख्या गर्दै, यस्तो कार्यलाई निरन्तरता दिन आवश्यक रहेको धारणा व्यक्त गरे ।
कार्यक्रममा जानकी एकेडेमीका चिकित्सक, नर्स, प्राविधिक कर्मचारी, साथै स्थानिय युवाहरू, सामाजिक संस्था तथा समुदायका प्रतिनिधिहरूको सक्रिय सहभागिता रहेको थियो । जानकी एकेडेमी अस्पतालले आगामी दिनहरूमा पनि यस्ता सामाजिक उत्तरदायित्वका कार्यक्रमहरूलाई निरन्तरता दिने प्रतिबद्धता व्यक्त गरेको छ ।