अजित तिवारी
प्रदेश–२ का मुख्यमन्त्री लालबाबु राउतले गतवर्षको भुक्तानीमा कर्मचारी बाधक बनेको भन्दै त्यसकाविरुद्धमा धर्नामा बस्ने चेतावनी दिएका छन् । उनले संघीय सरकारको उक्साहटमा प्रदेश सरकारका उपल्ला तहका कर्मचारीहरुले भुक्तानी गर्न नदिएको आरोप लगाए ।‘भुक्तानी गर्न भन्दा उपल्ला कर्मचारी भागीभागी हिँड्छन्,’ मुख्यमन्त्री राउतले मंगलबार भन्ने, ‘भुक्तानी नहुँदा प्रदेशसभा चल्न सकेको छैन। उपभोक्ताको पैसा दिऔं भन्दा कर्मचारी मान्दैनन्। भुक्तानी नगरे म आफैं धर्नामा बस्छु।’ संघीय सरकारले भुक्तानी नगर्न भनेको भन्दै प्रदेशका कर्मचारीहरु पन्छिने गरेको बताउँदै मुख्यमन्त्री राउतले भने,‘ओली सरकारले भनेकै कर्मचारीले मान्ने हो भने प्रदेश सरकार पनि संघले नै चलाए भइगो नि।’
प्रदेश २ सरकारले गत आर्थिक वर्षमा उपभोक्ता समितिमार्फत् गरेका ८ सय १४ वटा योजनाको ८६ करोड रुपैयाँ भुक्तानी गर्न बाँकी छ। असारको अन्तिम समयमा योजना सम्पन्नको फाइल आएपनि मूल्याकंन गरेर चेक बनाउन नभ्याउँदा भुक्तानी रोकिएको थियो। प्रदेश सांसदहरुले कमिसन नदिएको कारण भुक्तानी नगरेको आरोप लगाउँदै प्रदेशसभा बैठकमा हंगामा गरेपछि भुक्तानी विवाद बाहिरिएको थियो।
