मिटरब्याज साहुहरु पनि आन्दोलनमा उत्रिएका छन् । सरकार र मिटरब्याज पीडितबीच भएको ९ बुँदे सहमतिप्रति आपत्ति जनाउँदै मिटरब्याज साहुहरु आन्दोलनमा उत्रिएका हुन् ।
उनीहरुले सहमतिमा कपाली तमसुक, दृष्टिबन्धक, राजीनामा र चेक बाउन्स जस्ता सबै प्रक्रियालाई अवैध भनेको भन्दै असन्तुष्टि जनाएका छन् । उनीहरुले साहु र ऋणी दुवै पक्षलाई सँगै राखेर दुवै पक्षको कुरा सुन्नुपर्ने र सहमति सच्याउनुपर्ने माग गरेका छन् ।
उनीहरुले लेनदेन गर्न पाउनुपर्ने र आफूहरुले विभिन्न समयमा दिएको ऋण असुल गर्न पाउनुपर्ने माग गरेका छन् । ‘हामीले दिएको पैसा उठाउन पाउनुपर्छ । ऋणीहरुले खाएको ऋण तिर्नुपर्छ’, सिराहाका मिटरब्याज साहु महेश्वरप्रसाद यादवले भने, ‘सरकारले एकतर्फी निर्णय र सहमति गरेर हुँदैन ।’
उनले यदि आफूहरुले दिएको ऋण उठाउन नपाउने हो भने आफूहरुले बैंक तथा वित्तीय संस्थाबाट लिएको ऋण पनि नतिर्ने बताएका छन् ।
‘हामीले ऋण दिएका मात्र छैनौँ, लिएका पनि छौँ’, उनले भने, ‘नियम एकतर्फी हुनु हुँदैन । हामीले दिएको ऋण उठाउन नपाउने हो भने बैंकबाट लिएको ऋण पनि हामी तिर्दैनौँ ।’
