वीरगञ्ज, पुस १५ । विभिन्न २८ बुन्दे माग सहित चरणबद्ध आन्दोलन गर्दै आएका जनता समाजवादी पार्टी नेपालले आज वीरगञ्जमा विरोध सभा सम्पन्न गरेको छ।
संघीय लोकतान्त्रिक गणतन्त्रको रक्षा गर्दै मधेशी विद्रोहका बाँकी मागहरु पुरा गराउने उदघोषका साथ जसपा नेपाल मधेश प्रदेश समितिको आयोजनमा विरोधसभा सम्पन्न भएको हो ।
विरोधसभालाई सम्बोधन गर्दै जसपा नेपालका राष्ट्रिय अध्यक्ष उपेन्द्र यादवले प्रमुख तीन दलका कारण मुलुक गम्भीर आर्थिक, सामाजिक र नैतिक संकटमा फसेको आरोप लगाएका छन । उनले विगत ३५ वर्षदेखि सत्तामा रहेका कांग्रेस र कम्युनिस्टहरूको गलत नीतिका कारण करिब १३५ वटा उद्योग–कलकारखाना बन्द भएको, सरकारी विद्यालय कमजोर बनेको, कृषि क्षेत्र तहसनहस भएको र देश ३३ अर्ब रुपैयाँभन्दा बढी ऋणको बोझमा परेको बताए।
अध्यक्ष यादवले शिक्षा, स्वास्थ्य र कृषि क्षेत्र सम्हाल्न सरकार पूर्ण रूपमा असफल भएको टिप्पणी गरे। उनिहहरु शासनकालमा भ्रष्टाचार चरम सीमामा पुगेको उल्लेख गर्दै उनले संविधान संशोधन, भ्रष्टाचार न्यूनीकरण र शिक्षा सुधारका विषय जसपा नेपालले निरन्तर उठाउँदै आए पनि दुईतिहाइको दम्भमा ती मागहरू बेवास्ता गरिएको आरोप लगाए
उनले निराशाका कारण ‘जेन–जी’ युवाहरू विद्रोहमा उत्रिएको, ऐतिहासिक तथा सामरिक महत्वका संरचनामा क्षति पुगेको र नेताहरू भाग्न बाध्य भएको अवस्था सिर्जना भएको बताए। तर वर्तमान सरकारले ती युवाहरूलाई पनि विगतमा मधेशीहरूसँग गरिएझैँ झुक्याउने प्रयास गरिरहेको आरोप लगाए।
अध्यक्ष यादवले जसपा नेपाल निर्वाचनका लागि तयार रहे पनि हालको सरकार निर्वाचन गराउन असक्षम रहेको दाबी गरे। मधेश ८ जिल्लामा सीमित नभई २२ जिल्लासम्म फैलिएको भूगोल भएको उल्लेख गर्दै प्रदेश पुनर्संरचनाका लागि तत्काल संविधान संशोधन आवश्यक रहेको बताए। संविधान पुनर्लेखन नभएसम्म पार्टी संघर्षमै रहने उनको चेतावनी थियो।
