शैलेन्द्र क्रान्ति –
जनकपुरधाम, चैत १६ गते ।
प्रादेशिक अस्पताल जनकपुरमा आइतबारदेखि कोरोना संक्रमितको उपचार हुने भएको छ । १० वेड छुट्याएर कोरोनाको उपचार हुने प्रादेशिक अस्पताल प्रमुख डा. नागेन्द्र यादवले जानकारी दिए ।
‘कोरोना उपचारको लागि १० वटा बेड छुट्याइएको छ । उपचारको लागि व्यवस्थापन भइरहेको छ । उपकरणहरु आउन बाँकी नै छ ।’ अस्पताल प्रमुख डा. यादवले भने ‘कोरोनाका लक्षण देखिएका शंकास्पद बिरामीलाई मात्र उपचारको लागि वार्डमा राखिने छ । यहाँ कोरोना चेकजाँचको ल्याव छैन । शंकास्पद बिरामीको स्वाँव लिएर परीक्षण गर्न काठमाडौं नै पठाउनु पर्छ ।’
अस्पतालको अकास्मिक, प्रसुति, ज्वरो, डाइसिस लगायतका अतिआवश्यक सेवाहरु सुचारु नै रहने उनले बताए ।
यसअघि कोरोनाको उपचारको लागि जानकी मेडिकल शिक्षण अस्पतालको जनकपुर स्थित सिटी हस्पिटलमा हुने प्रदेश २ सरकारले निर्णय गरेको थियो । शिक्षण अस्पताल व्यवस्थापन पक्ष प्रतिवद्धताबाट पछाडि हटेपछि जनकपुर प्रादेशिक अस्पतालमा नै उपचार गर्ने व्यवस्था मिलाइएको छ । समाजिक विकास मन्त्री नवल किशोर साहको संयोजकत्वको कोरोना रोकथाम तथा नियन्त्रण कमिटीले शनिबार यो निर्णय गरेको प्रदेश २ स्वास्थ्य निर्देशनालय बरिष्ठ अधिकृत विजय झाले बताए ।
प्रदेश २ मा प्रादेशिक अस्पताल जनकपुरको अलावा पर्साको विरगञ्ज स्थित नेश्नल मेडिकल कलेज शिक्षण अस्पतालमा कोरोना उपचारको व्यवस्था मिलाइएको छ ‘नेश्नल मेडिकल कलेजमा ५० वटा आइसोलेशन बेड तयार गरिएको छ । कोरोनाको शंकास्पद बिरामी अथवा पुष्टि भएको खण्डमा त्यहाँ र प्रादेशिक अस्पताल जनकपुरमा तत्काल उपचार गर्ने व्यवस्थापन गरिएको छ ।’ बरिष्ठ अधिकृत झाले भने ।
उनले कोरोना उपचारको लागि चाहिने उपकरणहरु ल्याउने र व्यवस्थापन गर्ने काम भइरहेको बताए ।
