साेनमा— सोनमा गाउँपालिका स्वास्थ्य शाखाले पालिकाभित्र स्वास्थ्य सेवामा कार्यरत सम्पूर्ण कर्मचारी तथा स्वयंसेवकहरूलाई आवश्यक सामग्री वितरण गरेको छ। स्वास्थ्य सेवामा खटिने कर्मचारी तथा स्वयंसेवकहरूको कार्यसम्पादनलाई सहज, प्रभावकारी र व्यवस्थित बनाउने उद्देश्यले बैग, छाता, डायरी तथा त्रिपाल वितरण गरिएको हो।
गाउँपालिकाभित्रका विभिन्न स्वास्थ्य संस्थामा कार्यरत स्वास्थ्यकर्मी, कर्मचारी तथा स्वयंसेवकहरूलाई लक्षित गरी आयोजना गरिएको कार्यक्रममा स्वास्थ्य सेवामा प्रत्यक्ष रूपमा खटिने जनशक्तिलाई आवश्यक पर्ने सामग्री हस्तान्तरण गरिएको थियो। विशेषगरी गाउँघरमा पुगेर नागरिकलाई स्वास्थ्य सेवा तथा स्वास्थ्यसम्बन्धी जनचेतना प्रदान गर्ने क्रममा घाम, पानी तथा प्रतिकूल मौसममा समेत काम गर्नुपर्ने भएकाले छाता, त्रिपाल र बैगजस्ता सामग्री उपयोगी हुने बताइएको छ।कार्यक्रमको अध्यक्षता सोनमा गाउँपालिकाका अध्यक्ष विशेश्वर प्रसाद यादवले गर्नुभएको थियो। कार्यक्रममा वडा अध्यक्षहरू इन्द्रजित यादव र दिलकुमार यादव, शिक्षा सह संयोजक धर्मेन्द्र कुमार यादवलगायत गाउँपालिकाका स्वास्थ्य शाखाका कर्मचारी, स्वास्थ्यकर्मी तथा स्वयंसेवकहरूको उपस्थिति रहेको थियो।
स्वास्थ्य क्षेत्रलाई प्राथमिकतामा राखेर काम गरिरहेका छौँ : अध्यक्ष यादवकार्यक्रमलाई सम्बोधन गर्दै गाउँपालिका अध्यक्ष विशेश्वर प्रसाद यादवले स्वास्थ्य क्षेत्रलाई गाउँपालिकाले उच्च प्राथमिकतामा राखेको बताउनुभयो। नागरिकको आधारभूत आवश्यकता पूरा गर्ने क्रममा शिक्षा, स्वास्थ्य, खानेपानी तथा पूर्वाधारसँगै गुणस्तरीय स्वास्थ्य सेवा सबै नागरिकको पहुँचमा पुर्याउनु स्थानीय सरकारको महत्वपूर्ण जिम्मेवारी भएको उहाँको भनाइ थियो।
अध्यक्ष यादवले भन्नुभयो, “स्वास्थ्यकर्मी र स्वयंसेवकहरू गाउँपालिकाका नागरिकको स्वास्थ्यसँग प्रत्यक्ष जोडिएर काम गर्ने महत्वपूर्ण जनशक्ति हुन्। उहाँहरूले आफ्नो व्यक्तिगत सुविधा भन्दा पनि सेवाग्राही नागरिकको स्वास्थ्यलाई प्राथमिकता दिएर काम गरिरहनुभएको छ। त्यसैले उहाँहरूको कामलाई सहज र प्रभावकारी बनाउन आवश्यक स्रोतसाधन उपलब्ध गराउनु गाउँपालिकाको दायित्व हो।”उहाँले स्वास्थ्य सेवा अस्पताल वा स्वास्थ्य संस्थाभित्र मात्र सीमित नभई घर–घर र समुदायस्तरसम्म पुग्नुपर्ने धारणा राख्नुभयो। गर्भवती महिला, बालबालिका, ज्येष्ठ नागरिक तथा विपन्न समुदायका नागरिकलाई समयमै स्वास्थ्य सेवा उपलब्ध गराउन स्वास्थ्यकर्मी तथा स्वयंसेवकको भूमिका महत्वपूर्ण रहेको उहाँले उल्लेख गर्नुभयो।अध्यक्ष यादवले स्वास्थ्य क्षेत्रमा रोकथामात्मक तथा प्रवर्द्धनात्मक स्वास्थ्य सेवामा विशेष जोड दिनुपर्ने बताउँदै नागरिकलाई रोग लागेपछि उपचार गर्नेभन्दा रोग लाग्न नदिन जनचेतना फैलाउने, नियमित स्वास्थ्य परीक्षण गर्ने, सरसफाइ तथा पोषणसम्बन्धी जानकारी दिने कामलाई पनि प्राथमिकतामा राख्नुपर्ने धारणा व्यक्त गर्नुभयो।उहाँले स्वास्थ्यकर्मी तथा स्वयंसेवकलाई आवश्यक सामग्री उपलब्ध गराउँदा उनीहरूको कार्यक्षमता बढ्नुका साथै सेवाग्राहीसम्म स्वास्थ्य सेवा पुर्याउन थप सहज हुने विश्वास व्यक्त गर्नुभयो।
स्वास्थ्यकर्मीको मनोबल बढाउनु आवश्यक
कार्यक्रममा सहभागीहरूले स्वास्थ्य सेवामा कार्यरत कर्मचारी तथा स्वयंसेवकको मनोबल उच्च राख्न स्थानीय तहले आवश्यक सहयोग, स्रोतसाधन र प्रोत्साहनका कार्यक्रमलाई निरन्तरता दिनुपर्ने बताएका थिए।
स्वास्थ्य शाखामार्फत वितरण गरिएका सामग्रीले स्वास्थ्यकर्मी तथा स्वयंसेवकलाई फिल्डमा काम गर्न सहयोग पुग्ने बताइएको छ। विशेषगरी वर्षायाम तथा प्रतिकूल मौसममा समुदायस्तरमा पुगेर सेवा प्रवाह गर्ने स्वास्थ्यकर्मी तथा स्वयंसेवकका लागि छाता र त्रिपाल उपयोगी हुने, दैनिक कार्यसम्बन्धी सामग्री व्यवस्थापनका लागि बैग र डायरी उपयोगी हुने जनाइएको छ।कार्यक्रममा उपस्थित वडा अध्यक्ष इन्द्रजित यादव र दिलकुमार यादवले गाउँपालिकाले स्वास्थ्य क्षेत्रलाई प्राथमिकतामा राख्दै स्वास्थ्यकर्मी तथा स्वयंसेवकलाई आवश्यक सामग्री उपलब्ध गराएकोमा सकारात्मक रहेको बताउनुभयो।त्यस्तै, शिक्षा सह संयोजक धर्मेन्द्र कुमार यादवलगायत उपस्थित अतिथिहरूले पनि स्वास्थ्य सेवा नागरिकको जीवनसँग प्रत्यक्ष जोडिएको महत्वपूर्ण क्षेत्र भएकाले स्थानीय सरकारले स्वास्थ्य संस्थाको सुदृढीकरणसँगै स्वास्थ्यकर्मीको क्षमता तथा कार्य वातावरण सुधारमा ध्यान दिनुपर्ने धारणा राख्नुभयो।गाउँपालिकाले आगामी दिनमा पनि नागरिकलाई सुलभ, गुणस्तरीय र प्रभावकारी स्वास्थ्य सेवा उपलब्ध गराउने, स्वास्थ्य संस्थाको सेवा विस्तार गर्ने तथा समुदायस्तरमा स्वास्थ्यसम्बन्धी जनचेतनामूलक कार्यक्रमलाई थप प्रभावकारी बनाउने प्रतिबद्धता जनाएको छ।
