सप्तरी, वैशाख १४। सप्तरीमा यात्रुबाहक बस अनियन्त्रिण भएर दुर्घटना हुँदा तीन जनाको मृत्यु भएको छ । २२ बढी यात्री घाइते भएका छन् ।
मृत्यु हुनेमा सप्तरीको सप्तीकोशी नगरपालिका–१ बस्ने ७५ वर्षीय रत्नबहादुर मगराती छन् । उनको गोल्डेन अस्पतालमा उपचारको क्रममा मृत्यु भएको छ । भने अन्य दुई जनाको सनाखत हुन सकेको छ । घटना स्थलमै मृत्यु भएका ४५ वर्षीय एक महिला र ४७ वर्षीय एकजना पुरुष को पहिचान खुलेको छैन । उनिहरुको शब गजेन्द्र नारायण सिंह अस्पतालमा ल्याई सनाखत गराउने प्रयास भइ रहेको प्रहरीले जनाएको छ ।
पूर्व–पश्चिम राजमार्ग अन्तर्गत आइतबार मध्याह्न १२ बजेतिर सप्तरीको कञ्चनरुप नगरपालिका १० बदगामा उदयपुरबाट विराटनगर तर्फ जाँदै गरेको प्र १–०१–००१ ख ३४२० नम्बरको यात्रुबाहक बस आफैं अनियन्त्रित भएर पल्टेको इलाका प्रहरी कार्यालय कञ्चनपुरका डिएसपी माधवप्रसाद काफ्लेले जानकारी दिए ।
डिएसपी काफलेका अनुसार मृत्यु भएकाहरु च्यापिएर गम्भीर भएका थिए । गम्भीर, मध्यम र समान्य गरी दुई दर्जन यात्रु घाइते भएका छन् । उनीहरूको विभिन्न अस्पतालहरूमा उपचार भइरहेको डिएसपी काफ्लेले बताए । बसमा ३५ जना सवार रहेका थिए ।
बस चालक झापाको मेचिनगर नगरपालिका ७ का ४७ वर्षीय अमृत दर्जी र बसलाई इलाका प्रहरी कार्यालय कन्चनपुरको नियन्त्रणमा राखेर घटनाबारे थप अनुसन्धान गरिरहेको प्रहरीले जनाएको छ ।
