गोपाल झा
महोत्तरी, फाल्गुन २१ गते
महोत्तरीको पाँच वटा स्थानीय तहमा भएको निःशुल्क आँखा शिविरमा ४१२ जनालाई उज्यालो प्रदान गरिएको छ । सिबीएमको आर्थिक सहयोग तथा नेपाल नेत्र ज्योति संघ सागरमाथा चौधरी आँखा अस्पताल लहान र नेपाल रेडक्रस सोसाइटि महोत्तरीको प्राविधिक सहयोगमा सम्पन्न भएको आँखा शिबिर मार्फत ३५८ जनाको मोतिबिन्दुको निःशुल्क शल्यक्रिया गरेको हो । महोत्तरी जिल्लाका जलेश्वर , मटिहानी र मनरा सिस्वा नगरपालिका तथा महोत्तरी र पपिरा गाँउपालिकासंगको सहकार्यमा छुट्टाछुट्टै शिबिर सञ्चालन गरिएको थियो । 
नेत्ररोग विशेषज्ञ डा. सतबोध श्रेष्ठको प्रत्यक्ष संलग्नामा मोतिबिन्दु पहिचान भएकाहरुलाई शल्यक्रिया गरिएको छ ।
पैसाको अभावका कारण कोहि पनि अन्धोपनमा जिवन विताउन नपरोस् भन्ने हेतुले संचालन गरीएको पाँच दिने निःशुल्क आँखा शिविरमा ३० देखी ८० वर्षभन्दा माथि उमेर भएका ज्येष्ठ नागरिकमा मोतीबिन्दु पहिचान भएकाहरुलाई शल्यक्रिया गरिएको नेपाल नेत्रज्योति सङ्घ जिल्ला साखा महोत्तरीका सभापती बिजय कुमार गुप्ताले जानकारी गराएका हुन् ।
शिविरमा करीब २ हजार जनाको आँखा चेक जाँच गर्दा करीब ४ सय १२ जना महिला तथा पुरुषहरुमा मोतीबिन्दु पहिचान भएकाहरुलाई जलेश्र आँखा अस्पतालमा ल्याएर शल्यक्रिया गरिएको छ ।
मोतिबिन्दुको शल्यक्रिया गरिएका विरामीलाई मनरा नगरपालीका र महोत्तरी गाँउपालीकाले कालोचस्मा समेत निःशुल्क उपलब्ध गराएको नेपाल रेडक्रस सोसाइटी महोत्तरी जलेश्वरका सभापति दिपक मिश्रले जानकारी दिनुभयो ।
शिविरमा जिल्लाभित्र र बाहिर धनुषा लगायत भारतको बिहार राज्यबाट समेत आएका विरामीहरु सेवा लिएको नेत्रज्योति सङ्घ महोत्तरी शाखा सभापति गुप्ताले जानकारी दिनुभयो ।
गाँउ स्तरमा निःशुल्क शिविर संचालन हुँदा सेवा लिन आउनेहरुको सङ्ख्या बढी भएको जलेश्वर आँखा अस्पतालका नेत्ररोग डा. रजनिश झा बताउनुभयो । शिविरमा ठूलो सङ्ख्यामा सेवाग्राहीले सहभागिता जनाएका र सोहीअनुसार उनीहरुले आँखा परीक्षण तथा उपचार सेवा प्राप्त गरेको डा. झाले बताए ।
