धनुषामा बढ्न थाल्यो कोरोना संक्रमण

जनकपुरधाम, पुस ३ गते
कोरोनाको नयाँ भेरियन्ट नेपालमा समेत भेटिसकेपछि प्रदेश २ मा कोरोना संक्रमणको दर पुनः बढ्न थालेको छ ।
केही साता अघि सम्म प्रदेशमा कोरोना संक्रमण दर घट्दै गएकोमा अहिले आएर पुनः बढन थालेको छ । पछिल्लो १५ दिनमा प्रदेशमा झण्डै दोबरले कोरोना संक्रमण दर बढेको छ ।
नयाँ संक्रमितहरु थपिएकाहरुमध्ये अधिकांश धनुषाकै रहेको स्वास्थ्य निर्देशनालय प्रदेश २ ले जनाएको छ ।
स्वास्थ्य निर्देशनालय प्रदेश २ का निर्देशक विजय झाका अनुसार मंसिर १८ गते प्रदेशमा ३४ जना कोरोना संक्रमित रहेकोमा आजसम्म थपिएर ६५ जना भएको बताए ।
मंसिर १८ गते प्रदेशमा ३४ जना कोरोनाको सक्रिय संक्रमित रहेका थिए । जसमध्ये ३३ जना होम आइसोलेशनमै रहेका थिए भने १ जना चिकित्सकको निगरानीमा रहेका थिए । तर पुस ३ गतेमा भने प्रदेशमा ६५ जना कोरोनाको सक्रिय संक्रमित रहेका छन् । संक्रमितहरुमध्ये ६२ जना होम आइसोलेशनमा रहेका छन् भने ३ जना चिकित्सकको निगरानीमा रहेका छन् ।
प्रदेशमा ६५ जना कोरोना संक्रमित रहेकोमा धनुषामा मात्र ३५ जना सक्रिय संक्रमित रहेका छन् । त्यस्तै महोत्तरीमा १६, सिरहामा ५, सर्लाहीमा ३, पर्सामा ४, सप्तरीमा १ र बारामा १/१ जना कोरोनाको सक्रिय संक्रमित रहेका छन् ।