सिके राउतका ६२ जना कार्यकर्ता पक्राउ, भोलि प्रहरी कार्यालय घेर्ने तयारी

जनकपुरधाम – खानेपानी तथा ढल व्यवस्थापन आयोजना जनकपुरका प्रमुखलाई कुटपिट गर्दै अर्धनग्न बनाइ नगर परिक्रमा गराएको आरोपमा प्रहरीले डा. सिके राउत नेतृत्वको जनमत पार्टीका ६२ जना कार्यकर्तालाई पक्राउ गरेको छ ।
पक्राउ परेको घटना लगतै आफ्ना कार्यकर्ता रिहाईको माग गर्दै ‍‍ सिके राउत नेतृत्वको जनमत पार्टीका नेता कार्यकर्ताहरू जिप्रका धनुषा अगाडि धर्नामा बसेका थिए । कुनै पहल नभएपछि उनीहरू फर्केका छन् ।
पक्राउ परेकाहरूलाई कानुन बमोजिम कारबाही गरिने प्रतिबद्धता स्थानीय प्रशासनले जनाएको छ । धनुषाका प्रमुख जिल्ला अधिकारी बन्धु प्रसाद बास्तोलाले राष्ट्र सेवक कर्मचारीलाई कुटपिट गरी अर्धनग्न गरेर बजारमा दुर्व्यवहार गर्नु आपतिजनक, अमानवीय र अपराधिक घटना भएको बताए ।
उनले भने, ‘जनमत पार्टीको कार्यकर्ताहरूले कानूनी राज्यको उपहास हुने गरी गरेको हर्कत राजनीति दलको नभई अपराधिक र भूमिगत समूहको हो । लोकतान्त्रिक राज्यमा यस्तो क्रियाकलापलाई अपराधिक मानिनेछ ।’
राजनीति दलको आवरणमा कर्मचारी वा कुनै पनि व्यक्तिलाई यस्तो दुर्व्यवहार गर्नु क्षम्य नभई कानुन अपराध हो । घटनाको छानविन गरी संलग्न व्यक्तिहरूलाई नियन्त्रणमा लिने कार्य शुरू भएको छ, तिनीहरूलाई कानून बमोजिम कारबाही हुने उनले बताए ।
आजको घटनाले कुनै कार्यालयका कर्मचारीलाई नआत्तिन नडराउन आग्रह गर्दै तिनीहरूको सुरक्षाका प्रशासन प्रतिबद्ध छ’ संचारकर्मीसँग कुरा गर्दै उनले भने ।
यसैबीच पार्टी अध्यक्ष डा. सिके राउतको सचिवालयले समाजिक सञ्जाल फेसबुकमार्फत भोलि शुक्रबार जिल्ला प्रहरी कार्यालय घेराउ गर्ने जनाएको छ । पक्राउ परेका कार्यकर्ताहरूलाई यथाशिघ्र रिहा नगरे आन्दोलन गर्ने चेतावनी दिएको छ ।
जनमत पार्टीले फेसबुकमा लेखेको छ, ‘भोलि धनुषाको प्रहरी कार्यालय घेराउ हुने, गाउँ गाउँबाट उठौं घर घरबाट उठौं यो आन्दोलनलाई महिनौसम्म वारपार गरी जारी रहनेछ सबै जिल्ला तयार रहौं । पक्राउ परेका कार्यकर्ताहरूलाई यथाशिघ्र रिहा नगरे आन्दोलनको पुर्ण स्वरूप तिर जाने नेपाल पुलिस हेल्लो सरकार गृहमन्त्रालय ।
बिहीबार दिउँसो खानेपानी तथा ढल व्यवस्थापन आयोजना जनकपुरका निमित प्रमुख राजेश्वर कुशवाहालाई अर्धनग्न गरी हिलो दलेर नगर परिक्रमा गराएको थियो ।
सभार इकागज