विनोद महतो
महेन्द्रनगर, असोज १९ ।
विजया दशमी २०७८ को अवसरमा धनुषाको मिथिला नगरपालिका वडा नं. ५ विश्रामपुरमा जारी मैत्रीपूर्ण फुटलबल प्रतियोगिता अन्तर्गत चौथौ दिनको खेलमा आयोजक विश्रामपुर ‘ए’ टिम र बटेश्वर टिमबीच प्रतिस्पर्धा भएको छ । निकै रोचक र घमासाना भएको सो खेलमा विश्रामपुर ‘ए’ टिमले बटेश्वर टिम २–३ गोलले पराजित गर्दै दोस्रो सेमिफाइनलमा पुगेको छ ।
खेलमा निर्धारित समयभित्र बटेश्वरले २ गोल गरेको थियो भने आयोजक समेत रहेको विश्रामपुर ‘ए’ टिमले ३ गोल गरेको थियो । बटेश्वर टिमका लागि जर्सी नं. ७ का खेलाडी राजेश तमाङ्ग र जर्सी नं. ९ का खेलाडी विमल तमाङ्गले एक/एक गोल गरेका थिए । यस्तै प्रतियोगिताको आयोजक विश्रामपुर ‘ए’ टिमका लागि जर्सी नं. ८ का खेलाडी विक्की मगरले १ गोल र जर्सी नं. ७ का खेलाडी विकास भुजेलले २ गोल गरेका छन् ।
यस अघिको सोमबार भएको खेलमा मरधरको मगर टोल टिमलाई पराजित गर्दै आयोजक विश्रामपुर ‘बी’ टिम पनि पहिलो सेमिफाइनलमा पुगि सकेको छ । मंगलबारको खेलमा योगेन्द्र यादवले एम्पायर तथा राजेश भुजेल र संगम भुजेलले लाइन्सम्यानको रुपमा खेलाएका छन् ।
यता अब असोज २० गते हुने पहिलो सेमिफाइनल खेलमा विश्रामपुर ‘बी’ टिम मधुवासा टिमसँग प्रतिस्पर्धा गर्नेछ । असोज २१ गते हुने दोस्रो सेमिफाइनल खेलमा धारापानी स्कुल टोल र आयोजक विश्रामपुर ‘ए’ टिमबीच प्रतिस्पर्धा हुनेछ ।
प्रतियोगिताका फाइनल खेल असोज २३ गते हुनेछ । सो प्रतियोगितामा जम्मा ८ वटा फुटबल टिमको सहभागिता रहेको आयोजक विश्रामपुर युथ क्लवले जनाएको छ ।
