प्रहरी महानिरीक्षक शैलेश थापा क्षेत्रीबाट जिल्ला प्रहरी कार्यालय महाेतरी परिसरमा नवनिर्मित भवन समुद्घाटन

गोपाल झा
महोत्तरी , २९ साउन
प्रहरी महानिरीक्षक शैलेश थापा क्षेत्रीले जिल्ला प्रहरी कार्यालय महोत्तरीको परिसरमा नवनिर्मित कार्यालय, व्यारेक, कार्यालय प्रमुख निवास तथा सिनियर प्रहरी अधिकृत आवास भवनहरुको शुक्रबार आयोजित एक कार्यक्रमबीच समुद्घाटन गर्नुभयो ।
सो अवसरमा प्रहरी महानिरीक्षक थापा क्षेत्रीले भवन निर्माणमा सहयोग गर्ने हरुलाई सम्मानपत्र , प्रशंसापत्र र निर्माण व्यवसायीहरुलाई कदरपत्र प्रदान गर्नुभएको थियो ।
कार्यक्रममा प्रहरी महानिरीक्षक थापा क्षेत्रीले नयाँ भवनको निर्माणमा संलग्न सम्पूणर्मा धन्यवाद दिदै नयाँ भवन मार्फत जनताको आशा पनि बढेकोले प्रहरीले प्रदान गर्ने सेवाको गुणस्तरीयता बढाउनु पर्नेमा जोड दिनुभयो ।
गत वर्ष भन्दा यस आर्थिक वर्षमा अपराध घटेको र प्रहरीले गर्ने कार्यहरुलाई बस्तुगत एवं प्रविधियुक्त बनाउनुका साथै राजश्वमा वृद्धि, फरार प्रतिवादी पक्राउ र सफल मुद्दा लगायतका गतिविधिमा हरेक महिनाको अन्तमा मूल्याङ्कन गर्ने गरिएको चर्चा गर्दै प्रहरी महानिरीक्षक थापा क्षेत्रीले सुरक्षा जनता र प्रहरीको संयुक्त जिम्मेवारी भएकाले प्रहरीद्धारा संचालित अपराध नियन्त्रण अभियानमा सहभागी हुन सबैमा अनुरोध समेत गर्नुभयो ।
२ नम्बर प्रदेश प्रहरी कार्यालय जनकपुरधामका प्रमुख प्रहरी नायव महानिरीक्षक उमेश रन्जीतकार धन्यवाद ज्ञापन गर्नुभएको उक्त कार्यक्रममा मछीहानी नगरपालिकाका प्रमुख हरीप्रसाद मण्डल र प्रमुख जिल्ला अधिकारी तिर्थराज भटराईले जलेश्वर मटीहानी तथा महोत्तरीको बारेमा जानकारी गराउँदै शुभकामना मन्तव्य व्यक्त गर्नुभएको थियो ।
कार्यक्रममा जिल्ला प्रहरी कार्यालय महोत्तरीका प्रमुख दिनेश कुमार आचार्यले स्वागत मन्तव्य व्यक्त गर्नुभएको थियो भने प्रहरी निरीक्षक ई. चिरन्जीबी प्रताप महतोले भवन निर्माण सम्बन्धी प्रतिवेदन प्रस्तुत गर्नुभएको थियो ।
नेपाल सरकारको नियमित बजेटबाट कुल ९ करोड २८ लाख १० हजार २ सय ४० रुपैयाँको लागतमा १४ कठ्ठा १० धुर जग्गामा उक्त भवनहरुको निर्माण कार्य सम्पन्न भएको हो ।
भवन उद्घाटन कार्यक्रम पश्चात प्रहरी महानिरीक्षक शैलेश थापा क्षेत्रीले जिल्ला प्रहरी कार्यालयमा महोत्तरी तथा मातहत कार्यालयमा कार्यतर प्रहरी अधिकृत तथा जवानहरूलाई समसामयिक विषयमा आवश्यक निर्देशन समेत दिनुभएको थियो ।