२५ पुस, काठमाडौं । प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल प्रचण्डले समाजवादी मोर्चा सक्रिय बनाउने प्रयास अघि बढाएका छन् । यही प्रयासअन्तर्गत प्रचण्डले बिहीबार नेकपा एकीकृत समाजवादीका अध्यक्ष माधव नेपालसँग संवाद गरे ।
सिंहदरबारमा भएको भेटमा माओवादी केन्द्रका तर्फबाट उपमहासचिव वर्षमान पुन र एकीकृत समाजवादीको तर्फबाट वरिष्ठ उपाध्यक्ष बेदुराम भुसाल सहभागी थिए । समाजवादी मोर्चाको सक्रियता र संविधान संशोधनका एजेन्डाहरूका सम्बन्धमा छलफल भएको माओवादी केन्द्रका महासचिव देव गुरुङले जानकारी दिए ।
समाजवादी मोर्चा लामो समयदेखि निश्कृय छ । ४ असार २०८० मा माओवादी केन्द्र, एकीकृत समाजवादी, जनता समाजवादी पार्टी (नेपाल) र विप्लव नेतृत्वको नेकपाले समाजवादी मोर्चा बनाएका थिए ।
पछिल्लो समय उपेन्द्र यादव नेतृत्वको जनता समाजवादी पार्टी नेपाल समाजवादी मोर्चामा सक्रिय छैन । बिहीबार माओवादी र एकीकृत समाजवादीका शीर्ष नेताहरूको भेटमा उपेन्द्र यादवलाई मोर्चामा सक्रिय बनाउने विषयमा छलफल भएको थियो ।
नेताहरूका अनुसार अब केही समयभित्रै मोर्चाको बैठक बस्नेछ । त्यसपछि मोर्चाको गतिविधिलाई कसरी अगाडि बढाउने भन्ने तय हुनेछ ।
यसबीचमा मोर्चालाई थप विस्तार गर्ने र उपेन्द्र यादवलाई मोर्चामा सक्रिय गराउने जिम्मा एकीकृत समाजवादीका अध्यक्ष नेपालले पाएका छन् । नेताहरूका अनुसार अध्यक्ष नेपालले ‘उपेन्द्र यादवसँग म कुरा गर्छु’ भनेका छन् ।
