मलंगवा, सर्लाही, साउन ११ — सर्लाही प्रहरीले करिब १२ लाख १५ हजार ७५० रुपैयाँ बराबरको अवैध मदिरा र एक पिकअप गाडी नियन्त्रणमा लिएको छ।
जिल्लाको बलरा नगरपालिका–३ लक्ष्मीपुरमा अवैध मदिरा ओसारपसार भइरहेको भन्ने गोप्य सूचनाका आधारमा इलाका प्रहरी कार्यालय गडहिया, इलाका प्रहरी कार्यालय बलरा तथा सीमा सुरक्षा चौकी (बीओपी) छतैनाबाट खटिएको संयुक्त प्रहरी टोलीले सोमबार छापा मारेको थियो।
प्रहरीका अनुसार स्थानीय ज्ञानेन्द्र झाको भुसको गोठमा प्रदेश २–०३–००१ ख ५१३५ नम्बरको पिकअपबाट मदिरा अनलोड गर्दै गरेको अवस्थामा प्रहरीले मदिरा, पिकअप र दुई जनालाई नियन्त्रणमा लिएको हो।
नियन्त्रणमा पर्नेमा पिकअप चालक धनकौल गाउँपालिका–१ निवासी ३१ वर्षीय राजकुमार महतो तथा मदिराका धनी बलरा नगरपालिका–३ लक्ष्मीपुर निवासी ३७ वर्षीय ज्ञानेन्द्र झा रहेका छन्।
प्रहरीले २५० कार्टुन करिस्मा सौफी, ४७ कार्टुन गौरव सौफी, ४ कार्टुन १३ पिस ब्ल्याक एसी, ४ कार्टुन बियर, १ कार्टुन मैरिगोल्ड मदिरा तथा करिब १० लाख रुपैयाँ मूल्यको पिकअप गाडी नियन्त्रणमा लिएको हाे ।
बरामद गरिएका मदिरा र पिकअपसहितको कुल मूल्य १२ लाख १५ हजार ७५० रुपैयाँ रहेको प्रहरीले जनाएको छ। नियन्त्रणमा लिइएका व्यक्ति र बरामद सामानलाई आवश्यक कारबाहीका लागि भन्सार कार्यालय मलंगवा, सर्लाहीमा बुझाइएको प्रहरीले जनाएको छ।
