राजविराज, चैत १७ । मन्दिर स्तरोन्नतीका लागि आएको बजेट मागे जतिको कमिशन नर्दिदा पालिकाले अर्कै मन्दिरका लागि कार्यादेश दिएको सप्तरीको छिन्नमस्ता गाउँपालिका ४ स्थित रामजानकी मन्दिरका महन्थ बुद्दिलाल दासले आरोप लगाएका छन् ।
तराई मधेश समृद्धि कार्यक्रम अन्तर्गत उक्त पालिकामा रहेको रामजानकी मन्दिरको स्तरोन्नतीका लागि संघीय सरकारबाट गाउँपालिकामा पठाइएको ६३ लाखको बजेट प्राप्त गर्न आफूले ९ लाख रुपैया कमिशन दिन नसक्दा पालिकाका जिम्मेवार अधिकारीले उक्त बजेट अर्कै मन्दिरका लागि विनियोजन गरि कार्यादेश समेत दिएको ७५ बर्षीय महन्थ दासले आरोप लगाएका छन् ।
उनले पालिका प्रमुख विद्यानन्द चौधरी, उपप्रमुख राजुदेवी यादवको उपस्थितिमा प्रमुख प्रशासकीय अधिकृत केशवकुमार झाले ९ लाख रुपैयाँ कमिशन दिए मात्र कार्यादेश उपलब्ध गराउने भनी जवाफ दिएको सुनाए । आइतवार गाउँमै पत्रकार सम्मेलनको आयोजना गरि उनले कमिशनको खेलमा लागेका गाउँपालिका अध्यक्ष, उपाध्यक्ष र प्रमुख प्रशासकीय अधिकृतको भण्डाफोर गर्न आफूहरु संचारकर्मी माझ पुगेको बताए ।
विभिन्न विकास निर्माण कार्यमा आफ्नो अनुकूल उपभोक्ता समिति बनाउने र कमिशन लिई पालिकालाई भागवण्डाको खेलमैदान बनाउनेहरुको पर्दाफास गर्न पनि पत्रकार सम्मेलन गरिएको महन्थ दासको भनाई छ । यता छिन्नमस्ता गाउँपालिकका अध्यक्ष विद्यानन्द चौधरीले आफूमाथि लागाईएको आरोप निराधार रहेको बताएका छन् । उनले २०८१ भदौमै पालिकाले वडा नम्बर ४ लाई उपभोक्ता समिति गठन गर्न पत्र काटेकोमा तत्कालिन कार्यवाहक वडाध्यक्षको अध्यक्षतामा उपभोक्ता समिति गठन भई करिव ३० लाख बराबरको काम पनि सम्पन्न भईसकेको जानकारी दिए ।
योजनामा छिन्नमस्ता गाउँपालिका वडा नम्बर ४ मा रामजानकी मन्दिर निर्माण लेखि आएको र उक्त वडामा रामजानकी मन्दिर नामकै तीन वटा मन्दिर रहेकोले कार्यवाहक वडाअध्यक्षको सिफारिसमा सब भन्दा पुरानो मलाह टोलस्थित राम जानकी मन्दिर निर्माण कार्यका लागि कार्यदेश दिइएको स्पष्ट पारेका छन् ।
