नयाँ दिल्ली । भारतीय प्रधानमन्त्री नरेन्द्र मोदी यतिबेला पोल्यान्डको भ्रमणमा छन् । पोल्यान्डबाट शुक्रबार मोदी युक्रेन जान लागेका हुन् । तर उनी विमानबाट नभएर रेलबाट युक्रेन जाँदै छन् ।
मोदी पोल्यान्डबाट युक्रेन विशेष रेल चढेर जान लागेको बताइएको छ । यो रेल साधारण रेल होइन । यो रेल विलासी सुविधा र विश्व स्तरीय सेवाको लागि परिचित छ । यो विशेष रेललाई ट्रेन फोर्स वन भनिन्छ ।
रोचक कुरा चाहिँ के छ भने युक्रेनको राजधानी किभमा ७ घण्टा बिताउन मोदीले २० घण्टा ट्रेन फोर्स वनमा यात्रा गर्नेछन् । मोदी पोल्यान्डबाट रातिको समयमा युक्रेनका लागि निस्किनेछन् । पोल्यान्डबाट युक्रेनको राजधानी कीभसम्म पुग्न उनलाई २० घण्टा लाग्नेछ । मोदीले विमान नचढेर यो यात्राका लागि किन रेल रोजेका होलान् ? यसको सोझो जवाफ रुस–युक्रेन युद्ध हो । रुससँगको युद्धका कारण युक्रेनका विमानस्थल बन्द छन् । युक्रेनका सडक डरमर्दो भएका छन् । यस्तोमा रेल यात्रा सुरक्षित मानिएको छ ।
मोदी कहिले जाँदैछन् युक्रेन ?
मोदी भारतीय समय अनुसार आज साँझ अर्थात् २२ अगस्टमा विशेष रेलबाट युक्रेनको राजधानी कीभका लागि प्रस्थान गर्नेछन् । मोदीले किभमा करिब ७ घण्टा बिताउनेछन् । यस अवधिमा उनले युक्रेनी राष्ट्रपति भोलोदिमिर जेलेन्स्कीसँग भेटघाट गर्नेछन् । यस अवधिमा भारत र युक्रेनबीच महत्त्वपूर्ण रक्षा सम्झौतामा हस्ताक्षर हुने अपेक्षा गरिएको छ ।
मोदी अघि क–कसले गरेका छन् यो रेलबाट यात्रा ?
मोदी भन्दा पहिले पनि विश्वका कयौँ नेताहरूले यो रेलबाट यात्रा गरिसकेका छन् । अमेरिकी राष्ट्रपति जो बाइडेन युक्रेन जाँदा पनि यही रेलबाट गएका थिए । सन् २०२२ मा फ्रान्सका राष्ट्रपति इमानुएल म्याक्रोँ, जर्मन चान्सलर ओलाफ स्कोल्ज र इटालीका तत्कालीन प्रधानमन्त्री मारियो द्राघीले पनि यो विशेष रेलबाट युक्रेनको यात्रा गरेका थिए ।
