दुई समुदायबीच द्वन्दको सम्भावना बढेपछि वीरगञ्जमा अनिश्तिकालीन कर्फ्यु

दुई समुदायबीच द्वन्द हुनसक्ने सम्भावना देखेपछि वीरगञ्जमा स्थानीय प्रशासनले कर्फ्यु लगाएको छ । जिल्ला प्रशासन कार्यालय पर्साले सोमबार साँझ ५ बजेदेखि अनिश्तिकालीन कर्फ्यु आदेश जारी गरेको हो ।
पर्साका प्रमुख जिल्ला अधिकारी दिनेश सागर भुसालले स्थानीय प्रशासन ऐन २०२८ को दफा ६ (क) बमोजिम कर्फ्यु आदेश जारी गरेका हुन् ।
वीरगन्जको पूर्वमा नगवा चोक (बारा जिल्ला सिमाना), पश्चिममा तिलावे पुल,उत्तरमा परवानीपुर पर्सा र दक्षिणमा मितेरीपुल (भन्सार क्षेत्र) सम्म कर्फ्यु लगाइएको छ ।
वीरगन्जमा सुरक्षा व्यवस्था कडा पार्नका लागि नेपाल प्रहरी र सशस्त्र प्रहरी खटाइएको प्रमुख जिल्ला अधिकारी दिनेश सागर भुसालले बताए । सरस्वतीको मुर्ति सेलाउने विषयलाई लिएर रौतहटको ईशनाथ नगरपालिकामा भएको विवादलाई लिएर वीरगञ्जमा सोमबार प्रदर्शन भएको थियो । त्यस क्रममा विवाद र झडपको स्थिति आएकापछि कर्फ्यू आदेश जारी गर्नु परेको प्रमुख जिल्ला अधिकारी दिनेश सागर भुसालले निकालेको विज्ञप्तिमा उल्लेख छ ।