गोपाल झा
महोत्तरी , असोज ३ गते
महोत्तरीको सदरमुकाम जलेश्वर बजारबाट प्रहरीले दुई क्विन्टल भन्दा बढी लागूऔषध गाँजासहित दुई जनालाई पक्राउ गरेको छ ।
बिहीबार बिहान करीब ८ बजे जिल्ला प्रहरी कार्यालय महोत्तरीबाट खटीगएको प्रहरी टोलिले जलेश्वर नगरपालिका-१ स्थित जलेश्वरको मुटु मानिने जलेश्वरनाथ महादेब मन्दिर नजिकबाट दुई क्विन्टल १० किलो लागूऔषध गाँजा बरामद गरेको छ ।
जिल्ला प्रहरी कार्यालय महोत्तरीका प्रहरी नायब उपरीक्षक दिलीपकुमार गिरीका अनुसार बा.प्र.०१-०२६ च ४९२१ नम्बरको पिकप गाडीमाथि शङ्का लागि चेकजाँच गर्दा लुकाई छिपाई राखिएको १४ पोकामा अन्दाजी दुई क्विन्टल १० किलो लागू औषध गाँजा बरामद भएको हो ।
चौघ वटा पोकामा लागूऔषध गाँजा बरामद भएपछि गाडी सहित सहचालक धादिङ जिल्ला थाक्रे गाउँपालिका- ७ बस्ने वर्ष २३ को जीवन तामाङ र महोत्तरी जिल्ला जलेश्वर नगरपालिका- ७ बस्ने वर्ष २५ को सुरेन्द्र दासलाई नियन्त्रणमा लिइएको महोत्तरी प्रहरी जनाएको छ ।
पिकअप भित्र गाडीको बीचमा १४ वटा पोकामा राखिएको गाँजा चारै तिरबाट मिनिरल वाटरको पोकाले छोपिएको अवस्थामा फेला परेको प्रहरी नायव उपरीक्षक गिरीले बताएका हुन् ।
पानी बोकेको पिकअपको चालक र सहचालकको गतिविधि शङ्कास्पद देखिएपछि मिनिरल वाटरको काटुर्न हटाएर हेर्दा गाँजा बरामद भएको प्रहरीले बताएका छन् ।
पिकअप गाडी, पानीको कार्टुन र गाँजासहित चालक र सहचालकलाई जिल्ला प्रहरी कार्यालय महोत्तरीमा राखी आवश्यक अनुसन्धान भइरहेको प्रहरी नायब उपरीक्षक गिरी बताएका हुन् ।
