एक्सनमा जय कुमार, शिक्षा र स्वास्थ्यमा विशेष नजर

जनकपुरधाम, जेठ १८ । मुलुककै सबै भन्दा होचो गाउँ पालिका धनुषाको मुखियापट्टी मुसहरनीयाका नव निर्वाचित अध्यक्ष जयकुमार यादव पदभार ग्रहण गरे लगतै एक्सनमा देखिएका छन ।
पछिल्लो पाँच वर्ष दर्हो प्रतिपक्षको भूमिका निर्वाह गरेका यादव जनता समाजवादी पार्टी नेपालको तर्फ बाट निकटतम प्रतिद्वन्दी भन्दा झण्डै दोब्बर मतले विजयी भए । युवाहरुको ढुकढुकीको रुपमा परिचित यादव चुनाव ताका जनता माझ गरेका प्रतिबद्धताहरु पुरा गर्न पदभार ग्रहण गरे लगतै एक्सनमा देखिनु मुखियापट्टी मुसहरनीया बासीका लागी सुखद संकेत देखिन थालेको छ ।
नवनिर्वाचित अध्यक्ष यादव दीर्घकालिन विकासको मेरुदण्डको रुपमा रहेको शिक्षा र स्वास्थ्य क्षेत्र आफनो प्राथमिकतामा रहेको बताउदै आएका छन । त्यसै अनुरुप यादवले पदभार ग्रहण गरेकै दिन स्वास्थ्यचौकीहरुलाई पत्राचार गरि जनताको स्वास्थ्य जाँचमा कुनै कमि आउन नदिन निर्देशन दिए । त्यती मात्र नभई कार्यालय समयमा स्वास्थ्यकर्मीहरु स्वास्थ्यचौकी बाहिर रहन थालेको जनगुनासोलाई सम्बोधन गर्दै उनले नियमित कार्यालयमा उपस्थित भई सर्वसाधारण लाई सेवा दिन स्वास्थ्य चौकी प्रमुखहरुलाई पत्र मार्फत निर्देशन दिदै अध्यक्ष यादवले कार्यालय समयमा अनुपस्थित पाइए कारबाहीको भागी हुन चेतावनी समेत दिए ।
ग्रामिण स्वास्थ्यमा महत्वपूर्ण भूमिका निर्वाह गर्दै आएका महिला स्वास्थ्य स्वयंसेविकाहरुलाई प्राथमिकतामा राखेका यादवले आज मात्रै गापा भरिका महिला स्वंसेविकाहरुको लागी आयोजित पुनर्ताजगी तालिममा सहभागी भएर उच्च मनोवलका साथ काममा जुटन आग्रह गरे । उनले महिला स्वयंसेविकाको आवश्यक सेवा सुविधामा कमि हुन नदिने प्रतिबद्धता समेत जनाएका छन ।
अध्यक्ष यादव स्वास्थ्य क्षेत्र मात्र नभई मुमु गापाको शिक्षा क्षेत्रमा समेत आमूल परिवर्तन ल्याउने पहल थालेका छन । उनले मंगलबार मात्रै गापा भरिका विद्यालयका प्रमुखहरु भेला गरि शिक्षामा आमूल परिवर्तनका लागि अपनाउन सकिने उपायहरु बारे सुझाव संकलन गरेका छन ।
प्राधानाध्यापकहरुको सुझावलाई शतप्रतिशत कार्यान्वयन गरिने प्रतिबद्धता जनाउदै अध्यक्ष यादव भन्छन ,‘ विकासको मुल आधार नै शिक्षा र स्वास्थ्य हो । यो दुबैलाई सुधार गर्न पहिलो चरणको काम थालि सकेका छौ । शिक्षा र स्वास्थ्य ट्रयाकमा आए अन्य विकास पूर्वाधारको लागी खासै समस्या हुँदैन । ’