विद्युत प्राधिकरणका ४४५ कर्मचारी दिर्घसेवा र उपहार पदकबाट सम्मानित

काठमाडौं । नेपाल विद्युत प्राधिकरणले ३७ औं वार्षिकोत्सवका अवसरमा ४४५ कर्मचारीलाई दिर्घसेवा र उपहार पदकबाट सम्मान गर्ने भएको छ । प्राधिकरणले वार्षिकोत्सवको अवसर पारेर विभिन्न तहमा कार्यरत कर्मचारीलाई दिर्घसेवा र अवकास भएका कर्मचारीलाई उपहार पदबाट सम्मान गर्न लागेको हो ।
१२५ कर्मचारी दिर्घसेवा पदकबाट र ३२० कर्मचारीलाई उपहार पदकबाट सम्मान गर्न लागिएको प्राधिकरणले जनाएको छ । प्राधिकरणका अनुसार दिर्घसेवाबाट सम्मानित हुनेमा तह १० सह–निर्देशकदेखि तह ४ फोरमेन ड्राइभरसम्मको नाम स्वीकृत भईसकेको छ ।
दिर्घसेवा पाउनेमा १० तह २ जना (सह–निर्देशक र प्रबन्धक) छन् । यस्तै, ९ तहका ३, ८ तहका १४, ७ तहका ३१, ६ तहका ४२, ५ तहका ३२ र ४ तहका एक जनाले पदक पाउने भएका छन् ।
यस्तै, प्राधिकरणको सेवाबाट अनिवार्य तथा स्वेच्छिक अवकास लिएका ३२० कर्मचारीलाई उपहार पदक दिन लागिएको हो । उपहार पदक पाउनेमा ३ उप–कार्यकारी निर्देशकदेखि जुनियर हेल्परसम्म छन् ।