महोत्तरी, कार्तिक ६ ।
महोत्तरीको सोनमा गाउँपालिका वडा नं. २ स्थित तरहरी नयाँ बजारमा राष्ट्रिय स्वतन्त्र पार्टी (रास्वपा) का शुभचिन्तक तथा स्थानीय नागरिकहरूको उपस्थितिमा दीपावली तथा छठ पर्वको अवसरमा शुभकामना आदान–प्रदान कार्यक्रम सम्पन्न भएको छ।
राष्ट्रिय स्वतन्त्र पार्टीका स्थानीय नेता, कार्यकर्ता, शुभचिन्तक एवं गाउँका भद्रभलादमी तथा बुद्धिजीवीहरूको बाक्लो उपस्थिति रहेको उक्त कार्यक्रममा आपसी सद्भाव र खुसीयाली साटासाट गरिएको थियो।
कार्यक्रममा बोल्ने वक्ताहरूले नेपालीहरूको महान् चाडपर्वहरूले समाजमा आत्मीयता, भाइचारा र सामाजिक एकता कायम राख्न महत्वपूर्ण भूमिका खेल्ने विश्वास व्यक्त गरे। यस्ता चाडपर्व केन्द्रित सामूहिक कार्यक्रमहरूले समाजमा आपसी सम्बन्धलाई अझ प्रगाढ बनाउनुका साथै सामाजिक सद्भाव र एकतालाई थप मजबुत बनाउने धारणा सहभागीहरूले राखेका थिए।
कार्यक्रमको समापन गर्दै आयोजक तथा गाउँपालिका अध्यक्ष डा अशाेक यादवले यस पावन अवसरमा सम्पूर्ण दाजुभाइ, दिदीबहिनी, शुभचिन्तक तथा देशवासीहरूमा दीपावली तथा छठ पर्वको हार्दिक मंगलमय शुभकामना समेत व्यक्त गरेका छन्।
