रौतहट, असोज २१ ।
रौतहटको पूर्वाधार विकास कार्यालयमा कार्यरत लेखापाल सुदिप गौतममाथि युवाहरूको एक समूहले भ्रष्टाचारी भएको आरोप लगाउँदै कालो मोसो दलेका छन्।
घटना शुक्रबार साँझको हो। प्राप्त जानकारीअनुसार, गौतमलाई एक होटेलमा बसेर मदिरा सेवन गरिरहेको अवस्थामा पुगेका युवाहरूको समूहले कालो मोसो दलेका हुन्। उक्त समूहले “भ्रष्टाचार अन्त्य गरौं” र “भ्रष्टाचारीलाई कालो मोसो दल्नु पर्छ” भन्ने नारासहित उनको अनुहारमा कालो मोसो लगाएको भिडियो खिची सामाजिक सञ्जालमा सार्वजनिक गरेका थिए।
भिडियो सार्वजनिक भएपछि सामाजिक सञ्जालमा मिश्रित प्रतिक्रिया आएको छ। केहीले यसलाई भ्रष्टाचारविरुद्ध जनताको असह्य आक्रोश भनेका छन् भने केहीले कानूनी शासनलाई तोडेर व्यक्ति अपमान गर्नु गलत व्यवहार भएको टिप्पणी गरेका छन्।
प्रहरीका अनुसार घटनाबारे प्रारम्भिक जानकारी प्राप्त भइसकेको छ र आवश्यक अनुसन्धान प्रक्रिया अघि बढाइएको छ।
