काठमाडौँ । नेपाल पत्रकार महासंघको निर्वाचनको लागि गठित केन्द्रीय निर्वाचन समितिले प्रकाशन गरेको सदस्यता नामावलीप्रति जिल्ला अध्यक्षहरूले आपत्ति जनाएका छन् ।
केही जिल्ला अध्यक्षहरूले आइतबार विज्ञप्ति जारी गर्दै समितिले शनिबार प्रकाशन गरेको सदस्यता नामावलीप्रति आपत्ति जनाएका हुन् ।
विज्ञप्तिमा भनिएको छ, ‘प्रथमतः राजीनामा दिई सकेको र राजीनामा पनि स्वीकृत भइसकेका अध्यक्ष विपुल पोखरेलको हस्ताक्षरसहितको नामावली प्रकाशन गर्नु विधान विपरीत भएको हाम्रो ठहर छ । दोस्रो नेपाल पत्रकार महासंघको विधान अनुसार सदस्यता वितरण र नवीकरण शाखाको सिफारिस अनुसार प्रदेशले अनुमोदन गरी केन्द्रले अभिलेखीकरण गर्नुपर्ने व्यवस्था रहेको सबैमा सर्वविदितै छ । तर सो व्यवस्था विपरीत र निर्वाचनका लागि गठन भएको निर्वाचन समितिले नामावली प्रकाशन, नामावली उपर दाबी उजुरी समेत लिइसकेको अवस्थामा निर्वाचन निर्देशिका र कार्यविधि विपरीत मात्र होइन निर्वाचनको सामान्य सिद्धान्त, मूल्य मान्यता र विधि पद्धति विपरीत छ ।’
यस्तै सदस्यता नामावलीमा थप भएका सदस्यहरूको नामावली हेर्दा महासंघ केन्द्र आफैले जारी गरेको सदस्यता शुद्धीकरण मापदण्डको विपरीत रहेको उनीहरुले उल्लेख गरेका छन् ।
