भोटेकोशी बाढी पीडितका लागि गौशाला नगरपालिकाद्वारा १० लाख सहयोग घोषणा

महोत्तरी — भोटेकोशी नदीमा आएको भीषण बाढीका कारण रसुवा, नुवाकोट, धादिङ, चितवनलगायत जिल्लामा भएको जनधनको क्षतिप्रति गौशाला नगरपालिकाले दुःख व्यक्त गर्दै बाढीपीडितको राहत तथा उद्धारका लागि १० लाख रुपैयाँ सहयोग गर्ने घोषणा गरेको छ।
गौशाला नगरपालिकाका नगर प्रमुख डा. दिपेन्द्र महतोद्वारा जारी प्रेस विज्ञप्तिमार्फत विपद्मा परी ज्यान गुमाउनेहरूप्रति श्रद्धाञ्जली तथा शोकसन्तप्त परिवारजनप्रति समवेदना व्यक्त गरिएको छ। साथै, घाइतेहरूको शीघ्र स्वास्थ्यलाभको कामना गरिएको छ।
नगरपालिकाले बाढी प्रभावित नागरिकको राहत तथा उद्धारका लागि प्रधानमन्त्री राहत कोषमा तत्काल १० लाख रुपैयाँ जम्मा गर्ने निर्णय गरेको जनाएको छ।
विज्ञप्तिमा विपद्का समयमा उद्धार तथा पुनर्स्थापनाका कार्यलाई प्रभावकारी बनाउन गर्भवती तथा सुत्केरी महिला, बालबालिका, ज्येष्ठ नागरिक र अपाङ्गता भएका व्यक्तिहरूलाई विशेष प्राथमिकता दिन सम्बन्धित सबै पक्षलाई आग्रह गरिएको छ।
यसैबीच, पछिल्लो मौसमी प्रतिकूलतालाई मध्यनजर गर्दै गौशाला नगरपालिका क्षेत्रभित्रका नदी तथा खोला किनारमा बसोबास गर्ने नागरिकलाई सम्भावित बाढी तथा डुबानको जोखिमबाट जोगिन उच्च सतर्कता अपनाउन नगरपालिकाले अपिल गरेको छ।
नगरपालिकाले विपद्को समयमा सबै नागरिकलाई सुरक्षित रहन तथा आवश्यक सावधानी अपनाउन आग्रह गर्दै सम्भावित जोखिमबारे सम्बन्धित निकायलाई तत्काल जानकारी गराउनसमेत अनुरोध गरेको छ।