गोपाल झा , महोत्तरी, फल्गुन ११ गते
जनता समाजवादी पार्टी नेपाल – जसपा नेपाल ) ले प्रतिनिधि सभा निर्वाचनको सन्दर्भमा पार्टीको आधिकारिक उम्मेदवार विरुद्ध गतिविधि गरेको आरोपमा महोत्तरीका दुई पालिका प्रमुखसहित १५ जना नेता तथा कार्यकर्तालाई निष्कासन गरेको छ ।
पार्टी जिल्ला समिति महोत्तरीद्वारा जारी प्रेस विज्ञप्तिअनुसार जलेश्वर नगरपालिका का नगरप्रमुख सुरेश साह सोनार र पिपरा गाउँपालिका का अध्यक्ष रामजानकी यादवसहित १५ जनालाई पार्टी विधान उल्लंघन गरेको ठहर गर्दै कारबाही गरिएको हो ।
विज्ञप्तिमा प्रतिनिधि सभा निर्वाचनमा पार्टीका आधिकारिक उम्मेदवारको पक्षमा न उभिई नकारात्मक गतिविधि गरेको, अनुशासनहीन व्यवहार देखाएको तथा पार्टी हितविपरीत क्रियाकलापमा संलग्न रहेको उल्लेख गरिएको छ । सोही आधारमा पार्टी विधानअनुसार उनीहरूलाई निष्कासन गरिएको र निर्णय तत्काल लागू हुने जनाइएको छ ।
निष्कासित हुनेहरूमा कुशेश्वर सिंह, कुमरकान्ता, शेष जाली, सविता कुमारी देवी, रामनन्दन यादव, मोजिम राइन, सुरेश साह सोनार, सन्तोष साह, रामजानकी यादव, रामप्रकाश यादव, शम्भु यादव, राहुल पाण्डेय, श्याम यादव र हरि नारायण मण्डल रहेका छन्।
पार्टीले आधिकारिक उम्मेदवारको पक्षमा मतदान गर्न सम्पूर्ण नेता, कार्यकर्ता तथा समर्थकलाई एकताबद्ध भएर लाग्न आह्वान गरेको छ । उम्मेदवारविरुद्ध गतिविधि नगर्न ती नेताहरूलाई पहिलो पटक माघ १९ गते र अन्तिम पटक फागुन ८ गते सचेत गराइएको भए पनि सुधार नदेखिएपछि कारबाही गरिएको विज्ञप्तिमा उल्लेख छ ।
यससँगै श्याम यादव र हरि नारायण मण्डललाई पार्टी केन्द्रीय समितिबाट तथा पिपरा गाउँपालिकाकी उपाध्यक्ष वन्दना पाण्डेयलाई प्रदेश समितिबाट निष्कासनका लागि सिफारिस गरिएको जानकारी पनि दिइएको छ । जिल्ला अध्यक्ष रामबाबु साह र रामनरेश रायद्वारा जारी विज्ञप्तिमा पार्टीको अनुशासन, विधान र संगठनात्मक एकताको रक्षा गर्नु सबैको कर्तव्य भएको उल्लेख गरिएको छ ।
यसअघि पनि माघ १४ गते जसपा नेपालले प्रतिनिधि सभा निर्वाचनमा पार्टीको नीति तथा निर्णयविपरीत उम्मेदवारी दिएको आरोपमा पूर्वमन्त्रीसहित आठ जनालाई कारबाही गरेको थियो। पार्टीले संगठन सुदृढीकरण र अनुशासन कायम राख्न कडा कदम चालिरहेको जनाएको छ ।
निर्वाचन नजिकिँदै गर्दा महोत्तरीमा जसपा नेपालको यो निर्णयले स्थानीय राजनीतिक वृत्तमा तरंग पैदा गरेको छ ।
