स्वास्थ्य शिविर सम्पन्न
गोपाल झा
महोत्तरी, साउन २ गते
मटिहानी नगरपालिका र नेपाली सेनाको श्री गोरखनाथ गण परिकौलीको संयुक्त आयोजनामा महोत्तरी जिल्लाको मटिहानी नगरपालिका–९ सिमरदहीमा शुक्रबार एक दिने निःशुल्क स्वास्थ्य शिविर सफलतापूर्वक सम्पन्न भएको छ ।
स्वास्थ्य सेवा पहुँचबाट टाढा रहेका तथा आर्थिक रूपमा कमजोर वर्गका नागरिकलाई लक्षित गरी आयोजित गरीएको उक्त शिविरमा विभिन्न विशेषज्ञ चिकित्सकहरूको टोलीद्वारा स्वास्थ्य सेवा प्रदान गरिएको थियो । शिविरमा जेनरल फिजिसियन, स्त्री रोग विशेषज्ञ, बालरोग विशेषज्ञ, कान–नाक–घाँटी (ईएनटी) विशेषज्ञ, साथै दन्त चिकित्सकहरू समेतको सहभागिता रहेको थियो । स्वास्थ्य सेवामा सहज पहुँच सुनिश्चित गर्न सञ्चालन गरिएको यस शिविरमा नेपाली सेनाको फील्ड अस्पताल बर्दिबास र प्रदेश अस्पताल जलेश्वरबाट चिकित्सक तथा स्वास्थ्यकर्मीहरूको प्राविधिक सहयोग प्राप्त भएको थियो ।
स्वास्थ्य शिविरमा सयौँको संख्यामा स्थानीय बासिन्दाहरूको सहभागिता देखिएको थियो । शिविरमा सहभागी स्थानीयहरुले स्वास्थ्य सेवा गाँउमै पाउँदा निकै राहत महसुस भएको छ” भन्दै आयोजक संस्था र चिकित्सकप्रति आभार व्यक्त गर्दै यस्ता शिविरहरूले ग्रामीण क्षेत्रमा स्वास्थ्य चेतना बढाउनुका साथै तत्कालीन उपचार सेवामा ठूलो राहत पुर्याएको महसुस गरेको बताए ।
शिविरको उद्घाटन कार्यक्रममा मटिहानी नगरपालिकाका नगर प्रमुख हरि प्रसाद मण्डलले यस्ता कार्यक्रमहरूले समाजका गरीब, असहाय तथा उपचार खर्च थेग्न नसक्ने वर्गलाई प्रत्यक्ष लाभ हुने बताए । उनले यस्ता शिविरलाई निरन्तरता दिनु आवश्यक रहेको धारणा राख्दै नगरपालिकाको तर्फबाट सहकार्यका लागि प्रतिबद्धता समेत जनाएका हुन् ।
शिविरको औपचारिक कार्यक्रममा प्रमुख अतिथिका रूपमा प्रमुख जिल्ला अधिकारी नारायण प्रसाद रिसालको उपस्थिति रहेको थियो । त्यसका साथै नगर उपप्रमुख मंजु देवी साह, श्री गोरखनाथ गण परिकौलीका सेनानी विनोद बिकास पाठक, प्रहरी उपरीक्षक हेरम्ब शर्मा, राष्ट्रिय अनुसन्धान कार्यालय महोत्तरीका उप–अनुसन्धान निर्देशक चन्दन झा, वडा नं. ९ का वडाध्यक्ष मदन चौधरी, पत्रकार महासंघ महोत्तरीका अध्यक्ष महेश दास, स्वास्थ्य शाखा प्रमुख पवन कुमार मण्डल, महिला स्वास्थ्य स्वयंसेविका, पत्रकार, समाजसेवी तथा स्थानीय जनप्रतिनिधिहरूको समेत उल्लेखनीय उपस्थिति रहेको थियो ।
यस शिविरमार्फत स्वास्थ्य सचेतना अभिवृद्धि गर्नुका साथै प्राथमिक उपचार सेवाको पहुँच विस्तार गर्ने लक्ष्य लिइएको आयोजकले जनाएका छन् । सहभागीहरूको अनुसार, यस्ता कार्यक्रमहरूले समुदायमा सरकारी तथा सुरक्षासम्बन्धी निकायप्रति विश्वास बढाउनुका साथै नागरिकस्तरमा सकारात्मक सन्देश प्रवाह भएको छ ।
