जसपामा मुख्यसचिवमा कुरा नमिलेपछि मधेश समितिमा भाडभौलो

जनकपुरधाम, फागुन १० । अशोक राइ नेतृत्वको जनता समाजवादी पार्टी (जसपा)को शुक्रवार जनकपुरधाममा सम्पन्न प्रदेश स्तरीय भेलामा शीर्ष नेताहरु बीच कुरा नमिल्दा मधेश प्रदेश समितिले पूर्णता पाउन सकेको छैन ।
मधेश प्रदेश समिति गठन गर्ने उद्देश्यले भएको भेलामा पार्टीका मधेशकै शीर्ष नेताहरु बीच बाझाबाझ हुँदा पदाधिकारी बिनै मधेश प्रदेश समितिको घोषणा गरियो । तर, मधेश प्रदेशका मुख्यसचिवको बिषयमा भने शीर्ष नेता रेणु यादव, डा. वीरेन्द्र महतो र प्रदीप यादव बीच बाझाबाझ भएपछि समितिलाई पूर्णता नदिदैँ मधेश प्रदेश सभाका पूर्व सांसद अशोक कुमार यादवको अध्यक्षतामा ३५ सदस्यीय प्रदेश समितिको घोषणा गरियो । भेलाबाटै प्रदेश समितिलाई पूर्णता दिने भनिए पनि पदाधिकारीमा शीर्ष नेताहरुले आ–आफनो अडान नछोडेपछि पदाधिकारी छनोट गर्न नसकिएको भेलामा सहभागी एक नेताले जानकारी दिए ।
खास गरी मुख्यसचिवको विषयमा कुरा नमिलेको ती नेताले बताए । प्रदेश प्रदेशको अध्यक्ष घोषणा पहिला नै भईसकेको तर, मधेश प्रदेश समितिको मुख्यसचिवका लागि जसपाका शीर्ष नेताहरु यादव, डा. महतो र प्रदीपले आ–आफनो निकट नेताहरुको नाम अघि सारेपछि पदाधिकारी विना नै प्रदेश समिति घोषणा गरिएको स्रोतले जानकारी दियो ।
तीनै जना नेताले मुख्यसचिव आ–आफनो जिल्लामा पार्न लविङ्ग गरिरहेको स्रोतको दावी छ । मधेश प्रदेश समिति घोषणा गरिएको भए पनि नाम भने सार्वजनिक गरिएको छैन् । एक दुई दिन भित्रै पदाधिकारीहरुको नाम मिलाएर घोषणा गरिने जनाइएको छ । शुक्रवार सम्पन्न भेलामा अध्यक्ष अशोक राई सहित नेताहरुको व्यापक उपस्थिति रहेको थियो ।
जनता समाजवादी पार्टी (जसपा) नेपालबाट अलग भएर बनेको जसपाका नेताहरुले पार्टी भित्र गुटबन्दी, पार्टीका नेताहरुमा सत्ताको लोभ लगायतका आरोप लगाउँदै अलग पार्टी जसपा गठन गरिएको थियो । तर, जसपामा देखिएको विवादले ती समस्याबाट जसपाका नेताहरु नै ग्रसित रहेको स्पष्ट भएको जसपा नेपालका नेताहरुले आरोप लगाएका छन् ।
जसपा नेपालले जसपाका अध्यक्ष अशोक राई लगायत रेणु यादव, प्रदीप यादव, नवलकिशोर साह ‘सुडि’, वीरेन्द्र महतो लगायतका नेताहरुलाई पटक–पटक मन्त्री बनाए पनि उनीहरु सत्ताको प्रलोभनमा परेको जसपा नेपालका नेताहरुको टिप्प्णी छ ।