८ फागुन, जनकपुरधाम । सिरहाको नवराजपुर गाउँपालिका-१ भगवतीपुरकी १७ वर्षीया किशोरी रिंकुकुमारी सदाको मृत्यु प्रकरणमा ८ जनाविरुद्ध पूरक जाहेरी परेको छ ।
सामूहिक बलात्कार र शंकास्पद मृत्यु घटनामा पीडित परिवारले चारवटा मुद्दामा ८ जनाविरुद्ध इलाका प्रहरी कार्यालय, लहानमा जाहेरी दिएको हो ।
कर्तव्य ज्यान, जबर्जस्ती करणी, शरीर बन्धक र लेनदेन मिलापत्र गरी चारवटा शीर्षकमा पूरक जाहेरी परेको हो । सामूहिक बलात्कारमा संलग्न तीन जना र गाउँमै मिलाउन खोज्ने ५ जना पञ्चमाथि जाहेरी दिएको पीडित परिवारले जनाएको छ ।
पुरक जाहेरी दर्ता भएर अनुसन्धान अघि बढाएको सिरहाका प्रहरी उपरीक्षक रमेश पण्डितले जानकारी दिए । ‘ पीडित पक्षबाट पूरक जाहेरी आजै दर्ता परेको छ। जाहेरीको आधारमा हामीले अनुसन्धान प्रक्रिया अगाडि बढाउछौं । अहिलेसम्म कोही पक्राउ परेका छैनन् फरार भएकाहरूको खोजी कार्य जारी छ।’ उनले भने ।
गत माघ ३० गते रिंकु आफ्नै घरमा झुन्डिएको अवस्थामा मृत फेला परेकी थिइन् । त्यअघि २७ गते राति शौच गर्न बाहिर निस्केकी रिंकुमाथि सामूहिक बलात्कार भएको थियो ।
सो घटना मिलाउन गाउँमै पञ्चायत भएको थियो । वडासदस्यसहितका स्थानीयको संलग्नतामा २९ र ३० गते पञ्चायती बसेर घटना गाउँमै मिलाउने प्रयास गरिएको थियो । जसमा पीडकबाट १ लाख ४० हजार जरिवाना भराउने र पीडितलाई प्रहरीमा जान नदिने निर्णय गरेको थियो ।
सो घटनामा मधेश प्रदेश प्रहरी कार्यालय छानबिन समिति गठन गरी अनुसन्धान गरिरहेको छ
