बुटवल । जनता समाजवादी पार्टी नेपाल (जसपा) का अध्यक्ष उपेन्द्र यादवले कांग्रेस–कम्युनिस्टले जनतालाई अधिकार दिन नचाहेको आरोप लगाएका छन् ।
जसपा नेपाल जिल्ला समिति रुपन्देहीको संयोजनमा आज भैरहवामा भएको ‘जनतासँग जसपा नेपाल आधारभूत सङ्गठन निर्माण अभियान’ अन्तर्गत अभिमुखीकरण कार्यक्रममा बोल्दै अध्यक्ष यादवले सो कुरा बताएका छन् ।
पूर्वउपप्रधानमन्त्री समेत रहेका यादवले कांग्रेस र एमालेका कारणले मुलुकमा परिवर्तन नभएको जिकिर गर्दै अब जनताको अधिकारको रक्षा जसपाले गर्ने दाबी गरे । उनले जसपा नेपालले महिला, दलित, मधेसी, मुस्लिम,जनजाति तथा सम्पूर्ण उत्पीडित समुदायको लागि लड्ने समेत बताए ।
जनता जागरूक र सङ्गठित भए कुनै परिवर्तन असम्भव नभएको उनको भनाइ थियो । नेपालमा संसारको सबैभन्दा महँगो निर्वाचन प्रणाली भएको र निर्वाचनमा पैसाको खेल भएकाले पूर्ण समानुपातिक निर्वाचन प्रणाली आवश्यक रहेको उनले बताए ।
त्यस्तै जसपा नेपालका उपाध्यक्ष राजकिशोर यादवले कांग्रेस, एमाले र माओवादीबाट अब देश चल्न नसक्ने दाबी गरे । पार्टीका केन्द्रीय महासचिव रामकुमार शर्माले जसपा नेपालले उत्पीडित समुदायका लागि निरन्तर आवाज उठाउँदै आएको बताए ।
