गोपाल झा
महोत्तरी ,जेठ ७ गते
महोत्तरीको औरही नगरपालिका -०८ टिम्कीयाबाट १०७ किलो ग्राम गाँजासहित एउटा भारतीय नम्बर प्लेटको कार र चालकलाई प्रहरीले नियन्त्रणमा लिएको छ ।
पक्राउ पर्नेमा सर्लाहीको पर्सा गाउँपालिका-१ का २१ वर्षीय चन्दन यादव रहेको जिल्ला प्रहरी कार्यालय महोत्तरीले जनाएको छ ।
सोमवार जिल्लाको औरही नगरपालिका-८ टिम्कियामा बीआर ३० एएच २३८८ नम्बरको भारतीय नम्बर प्लेटको कारलाई शंकाको आधारमा प्रहरीले चेकजाँच गर्दा १०७ किलो गाँजा बरामद भएको जिल्ला प्रहरी कार्यालय महोत्तरीका प्रहरी निरीक्षक धर्मराज मुडभरीले जानकारी गराएका हुन् । 
कारको डिक्कीमा लुकाएर लैजाँदै गरेको अवस्थामा २० पोकामा रहेको १०७ किलो ४८५ ग्राम गाँजा बरामद भएको प्रहरी निरीक्षक मुडभरीले बताए ।
प्रहरीले पक्राउ परेका यादवसँगै गाँजा ओसारपसारमा प्रयोग भएको कार पनि नियन्त्रणमा लिएको छ । पक्राउ परेका यादवलाई महोत्तरी जिल्ला अदालतबाट ७ दिनको म्याद थप गरी थप अनुसन्धान गरिरहेको जिल्ला प्रहरी कार्यालय महोत्तरीले जनाएको छ ।
