महोत्तरीमा श्रोत नखुलेको ५५ लाख रकम सहित दुईजना पक्राउ

गोपाल झा
महोत्तरी , १३ चैत्र श्रोत न खुलेको ५५ लाख रकम सहित महोत्तरी प्रहरीले दुईजनालाई नियन्त्रणमा लिएको छ । महोत्तरीको औरही नगरपालिका १ स्थित जलेश्वर,रामगोपालपुर बर्दिवास सडक खण्डमा ज९प ८२४७ नं.को मोटरसाईकलमा सवार दुईजनाले बोकेको एक हजार दरको ४५ सय थान र पाँच सय दरको दुई हजार थान गरी जम्मा रू. ५५ लाख नेपाली रुपयाको स्रोत खुलाउन नसकेपछि उनीहरुलाई प्रहरीले नियन्त्रणमा लिई जलेश्वर भन्सार कार्यालय बुझाएको जिल्ला प्रहरी कार्यालय महोत्तरीका प्रवक्ता डिएसपी प्रकाश विष्टले बताए ।
पक्राउ पर्नेहरूमा औरही नगरपालिका- २ चेपकट बस्ने अन्दाजी वर्ष २० को धीरजकुमार यादव र सोही ठाउँका रमेशकुमार सहनी रहेको डिएसपी विष्टले बताएका हुन् ।
पक्राउ पर्नेले उक्त पैसा कहाँबाट र कुन प्रयोजनका लागि ल्याएको नखुलाएकाले थप अनुसन्धानसमेत भइरहेको डिएसपी विष्टले जानकारी दिए ।