फागुनमा दुई किशोरीलाई सामूहिक बलात्कार गरेको आरोपमा चार जनालाई प्रहरीले नियन्त्रणमा लिएको छ ।
पक्राउ पर्नेहरूमा जलेश्वर– ६ का २६ वर्षीय खुशनुर अन्सारी, सोही ठाउँका २४ वर्षीय राजु ठाकुर, ३४ वर्षीय सन्तोष ठाकुर र एक १७ वर्षीय किशोर रहेको महोत्तरीका एसपी श्यामकृष्ण अधिकारीले जानकारी दिए । दुई किशोरीलाई सात जनाले बलात्कार गरेकोमा चार जनालाई नियन्त्रणमा लिइएको र बाँकी तीन जनाको खोजी भइरहेको प्रहरीले जनाएको छ ।
एसपी अधिकारीले घटनालाई प्रहरीले गम्भीरतापूर्वक लिएको भन्दै बलात्कारमा संलग्न अन्य तीन जनाको पनि पहिचान भइसकेको र छिट्टै पक्राउ पर्ने विश्वास व्यक्त गरे । प्रहरी निरीक्षक केदार बस्नेतले घटनालगत्तै प्रहरीले किशोरीहरूको उद्दार गरेर उपचार गराएको भन्दै अहिले उनीहरूको स्वास्थ्यमा राम्रो सुधार आएको बताए । उनले भने, ‘स्थानीयले किशोरीहरू चिच्याएको सुनेर खबर नगरेको भए उनीहरूको ज्यानै जाने खतरासमेत रहेको थियो ।’
घटना अत्यन्तै गम्भीर देखिएको भन्दै प्रहरी निरीक्षक बस्नेतले घटनामा संलग्नहरूलाई हदैसम्मको कारबाही गराउन प्रहरीले आफ्नोतर्फबाट कुनै कसर बाँकी नराख्ने बताए । उनका अनुसार एक जनालाई दुई र अर्कोलाई पाँच जनाले बलात्कार गरेका थिए ।
यस्तो छ घटना विवरण
गत १५ फागुनमा जलेश्वरमा माध्यमिकी परिक्रमाको रौनक थियो । परिक्रमा यात्री तथा जलेश्वरका स्थानीय मेलामा व्यस्त भएको बेला राति करिब साढे नौ बजे मेला स्थलभन्दा केही पर केटीहरूले चिच्याउँदै गुहार मागेको आवाज सुनियो । मेलाको हल्लाले उनीहरूको रोदन स्पष्ट सुनिएको थिएन । निरन्तरको चिच्याहटपछि केही स्थानीय आवाज आएतिर अगाडि बढे ।
स्थानीय र प्रहरी करिब–करिब सँगसँगै घटनास्थल पुग्दा किशोरीहरू रोइरहेका थिए । प्रहरीले घटनास्थलबाटै राजु ठाकुर र सन्तोष ठाकुरलाई नियन्त्रणमा लिए पनि उनीहरूले घटनामा आफूहरूको संलग्नता रहेको इन्कार गरे । तर उनीहरू दुवै जनाको कल डिटेल अध्ययन गर्ने क्रममा अहिले प्रहरी नियन्त्रणमा रहेका १७ वर्षीय किशोर (संकेत नाम २१ जलेश्वर ०७६ कुमार प्रभात)ले घटनाको सम्पूर्ण विवरण बताएको प्रहरीले जनाएको छ ।
सभार नायाँ पत्रिका डट कम
