बलात्कार मुद्दामा ‘बाबा’ले पाए अदालतबाट सफाइ

गणेश लम्साल,
विराटनगर
२०७७ मङ्सिर २२ सोमबार
‘सिद्धबाबा’ भनिने कृष्णदास गिरीलाई जिल्ला अदालत सुनसरीले बलात्कार मुद्दामा सफाइ दिएको छ । जिल्ला अदालत सुनसरीका न्यायाधीश अर्जुन कोइरालाको इजलासले बादीको माग दाबी नपुगेको भन्दै उनलाई सफाइ दिएको हो ।
१२ मंसिरमा सर्वोच्च अदालतले उच्च अदालत विराटनगरको आदेश सदर गर्दै आरोपी कृष्णदासलाई थुनामै राखेर अनुसन्धान गर्न आदेश दिएको १० दिनपछि सुनसरी जिल्ला अदालतले अन्तिम फैसला गर्दै उनलाई सफाइ दिएको हो ।
सुनसरीको चतराधामस्थित आश्रममा आफ्नै अनुयायीलाई ४ कात्तिक ०७६ मा बलात्कार गरेको आरोप कृष्णदासमाथि लागेको थियो । बादी महिलाले आफूमाथि बलात्कार भएको किटानी जाहेरी दिएपछि पक्राउ पर्ने डरले कृष्णदास १२ मंसिरमा सिकिस्त बिरामीको बहाना बनाएर विराटनगरस्थित विराट अस्पतालमा भर्ना भएका थिए ।
सुनसरी प्रहरीले उनलाई १६ मंसिरमा पक्राउ गरी अस्पतालमै राखेर पटकपटक अदालतमा म्याद थप गराएर अनुसन्धान गरेको थियो ।
१० पुस ०७६ मा सिद्धबाबाविरुद्ध प्रहरीले बलात्कार अभियोगमा सुनसरी अदालतमा मुद्दा दर्ता गराएको थियो । १४ पुस ०७६ मा जिल्ला अदालत सुनसरीले सिद्धबाबालाई तीन लाख धरौटीमा थुनामुक्त गरेको थियो ।
उनलाई ९ माघ ०७६ मा उच्च अदालत विराटनगरले जिल्ला अदालत सुनसरीको आदेशलाई बदर गर्दै थुनामा राखेर अनुसन्धान गर्न आदेश गरेको थियो । उच्चको आदेशपछि पक्राउ पर्ने डरले भारततर्फ फरार भएका कृष्णदास पछि अदालतमा हाजिर भएपछि झुम्का कारागारमा बस्दै आएका थिए ।
उच्च अदालत विराटनगरको आदेशलाई सदर गर्दै १२ मंसिरमा सर्वोच्च अदालतका न्यायाधीश आनन्दमोहन भट्टराई र प्रकाश ढुंगानाको संयुक्त इजलासले आरोपी सिद्धबाबालाई थुनामै राखेर अनुसन्धान गर्न आदेश गरेको थियो ।