प्रतीक्षा खबर
बारा, वैशाख ९ गते ।
बारामा गुणस्तरहीन दाल राहत बाँडेको आरोपमा २ जना वडाध्यक्षसहित पाँच जना पक्राउ परेका छन् ।
तीन दिनअघि नै उनीहरूलाई पक्राउ गरेपनि प्रहरीले अझै सार्वजनिक गरेको छैन । पक्राउ परेकाहरूमाथि कालोबजारी मुद्दाअन्तर्गत जिल्ला प्रशासन कार्यालयबाट १० दिनको म्याद लिई हिरासतमा राखी थप अनुसन्धान भइरहेको बाराका प्रहरी उपरीक्षक कृष्ण पंगेनीले जानकारी दिए ।
बाराको कलैया उपमहानगरपालिका ७ मा रहेको यादव आईस एण्ड कोल्ड स्टोरमा चार वर्षदेखि भण्डारण गरी राखिएको रहरको दाल खरिदबिक्रीमा उनीहरु संलग्न रहेकोले हिरासतमा राखि बयान सुरु गरिएको एसपी पंगेनीले बताए ।
कलैया उपमहानगरपालिका १ का वडाध्यक्ष हरिओम साह सोनार र ७ का वडाध्यक्ष सर्फुल्लाह अन्सारी, वडा २० का सचिव खेदु मियाँ, वीरगन्जस्थित धनलक्ष्मी दाल मिलका सञ्चालक तेजकरण जैन र कोल्डस्टोरका कर्मचारी कृष्णप्रसाद यादवलाई नियन्त्रणमा लिइएको प्रहरी उपरीक्षक पंगेनीको जानकारी दिए ।
प्रहरीले जैनलाई उनको आफ्नो घर कीर्तिपुर नगरपालिका २ बाट नियन्त्रणमा लिएको हो । पक्राउ परेका जैनले आफ्नो दाल कोल्डस्टोरका सञ्चालकले बिक्री गरेको भन्दै जिल्ला प्रशासन र उद्योग वाणिज्य महासंघमा दाल उपलब्ध गराई दिन र मनोमानी बिक्री गर्नेमाथि कारबाहीको पहल गरिदिन निवेदन दिएका छन् । अरुलाई जिल्लाबाटै नियन्त्रणमा लिएको हो ।
पक्राउ परेकाहरुको अनुसन्धान भइरहेको र अन्यको पनि संलग्नता रहे नरहेको बारेमा सुक्ष्म रुपमा अनुसन्धान भइरहेको जिल्ला प्रहरी कार्यालय बाराका प्रवक्ता प्रहरी नायव उपरीक्षक गौतम मिश्रले जनाकारी दिए ।
त्यसैगरी अनुगमनपछि प्रहरीले उक्त कोल्डस्टोर शिल गरेको छ । सभार टुडेपाटी
